Xəzər Universitetinin Karyera və Məzunlar Mərkəzinin təşkilatçılığı ilə 2026-cı il martın 5-də “NA Academy” xaricdə təhsil şirkəti tərəfindən “Xaricdə magistr təhsili” mövzusunda  məlumat sessiysı keçirilib. “Xəzər”in Neftçilər kampusunda təşkil olunan görüşdə tələbələr xarici universitetlərdə magistr proqramları, qəbul şərtləri və müraciət prosesinin mərhələləri haqqında məlumatlandırılıblar. Eyni zamanda, iştirakçılar beynəlxalq təhsil imkanları, akademik inkişaf perspektivləri və xaricdə təhsilin gələcək karyera imkanlarına təsiri barədə də ətraflı bilgi alıblar.

“NA Academy” şirkəti  nümayəndələri  tələbələri   müasir əmək bazarında  xüsusi tələbat olan sahələr üzrə təqdim olunan magistr proqramları ilə tanış ediblər.  Bu istiqamətlər arasında informasiya texnologiyaları, süni intellekt, biznes və menecment, digital marketinq, eləcə də psixologiya və klinik psixologiya kimi ixtisaslar yer alır.

Görüşün diqqətçəkən məqamlarından biri də beynəlxalq tələbə mübadilə imkanları ilə bağlı  olub. “Tələbə mübadiləsi”  proqramları çərçivəsində tələbələr Almaniyada təhsil alarkən, Kanada, Çin və ABŞ universitetlərində bir semestrlik mübadilə proqramında iştirak edə bilərlər.

Təqdimat zamanı şirkətin nümayəndələri - təsisçi və direktor, Xəzər Universitetinin məzunu Mürsəl Muradov, Avropa Universitetinin (University of Europe) Azərbaycanda rəsmi nümayəndəsi Leyla Həmidova proqramların məqsədi, müraciət qaydaları və iştirakçılar üçün açılan perspektivlər barədə ətraflı məlumat veriblər.

Tədbir tələbələr tərəfindən böyük maraqla qarşılanıb və iştirakçılar xaricdə təhsil planları ilə bağlı suallarını birbaşa mütəxəssislərə ünvanlandırmaq imkanı əldə ediblər. Tədbir tələbələrin beynəlxalq təhsil imkanları barədə məlumatlılığının artırılması və onların gələcək akademik və peşəkar inkişafına dəstək məqsədi daşıyıb.