Xəzər Universiteti, Azərbaycan Milli Elmlər Akademiyası, Yunus Emre İnstitutu, Türk Dil Qurumu və Mərmərə Universiteti Türkiyat Araştırmaları İnstitutunun birgə təşkilatçılığı ilə 2026-cı il fevralın 27-28-də  “100-cü ilində Baki Türkoloji Qurultayı “ adlı beynəlxalq simpozium keçirildi.

Simpozium ilk gündə   yüz il əvvəl Birinci Türkoloji Qurultayın keçirildiyi, hazırda AMEA-nın Rəyasət Heyətinin yerləşdiyi tarixi binada, eyni salonda təşkil olundu. Simpoziumun ikinci günü   isə fevralın 28-də   Xəzər Universitetində davam etdi. Universitetin Tarix və arxeologiya departamentinin təşkilatçılığı ilə keçirilən iclasın açılışında Azərbaycan Respublikasının  və Türkiyə Cümhuriyyətinin Dövlət himnləri  səsləndirildi. Sonra  Xəzər Universitetinin Kamera Orkestrinin hazırladığı musiqili proqram təqdim olundu. Açılış  mərasimində çıxış edən  Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı  bildirdi ki, türkoloji yalnız dilçilik sahəsi deyil, bütövlükdə türk xalqlarının ortaq tarixi yaddaşını, mədəni kimliyini və mənəvi irsini birləşdirən fundamental elmi istiqamətdir. O, Bakı Türkoloji Qurultayının 100 illiyinin qeyd olunmasını türk dünyasında elmi həmrəyliyin simvolu kimi qiymətləndirdi.

İki gün dəvam edən simpoziumda, həmçinin, Türkiyə millət vəkili, AK Partiya sədr müavini, Türk Dövlətləri ilə əlaqələr üzrə başqan Prof. Dr. Kürşat Zorlu, Türkiyə Cümhuriyyətinin Azərbaycandakı fövqəladə və səlahiyyətli səfiri Prof. Dr. Birol Akgün, Yunus Emre İnstitutunun başqanı Prof. Dr. Abdurrahman Aliy, Türkiyənin Mədəniyyət və Turizm nazirinin müavini Dr. Serdar Çam,  Təhsil nazirinin müavini Dos. Celile Ören Ökten,  Türk Dil Qurumunun başqanı Prof. Dr. Osman Mert,  AMEA-nın prezidenti Akad. İsa Həbibbəyli,  Beynəlxalq Türk Akademiyasının prezidenti Akad. Şahin Mustafayev,  TÜRKSOY-un Baş katibinin müavini Sayit Yusuf, Azərbaycan Respublikasının Mədəniyyət nazirinin müavini Fərid Cəfərov, Elm və Ali Təhsil üzrə Dövlət Agentliyinin direktoru Ülkər Səttarova, Azərbaycan Yazıçılar Birliyinin sədri, Xalq yazıçısı Anar Rzayev, Qazaxıstan Respublikası Təhsil və Elm Nazirliyinin Elm komitəsinin       M.O. Auezov adına Ədəbiyyat və İncəsənət İnstitutunun elmi işlər üzrə direktor müavini Prof. Almira Kaliyeva,  Marmara Üniversitetinin professoru, yazıçı İlyas Kemaloğlu, Özbəkistan EA-nın vitse-prezidenti, Prof. Bahrom Abdukhalimov  çıxış etdilər.

Plenar iclas və panel müzakirələrində tanınmış alimlərdən Prof. Dr. Osman Fikri Sertkaya, Prof. Dr. Ahmet Bican Ercilasun, Prof. Dr. Yavuz Akpınar, Prof. Dr. Ahmet Taşağıl və digər nüfuzlu tarixçi və türkoloqların da məruzələri dinlənildi.  Məruzələrdə qədim türk yazılı abidələri, ortaq əlifba məsələləri, türk xalqlarının tarixi-mədəni əlaqələri və müasir türkoloji tədqiqatların metodoloji istiqamətləri geniş şəkildə təhlil olundu. Toplantıda Azərbaycan, Türkiyə, Qazaxıstan, Özbəkistan, Türkmənistan və Qırğızıstandan  60-dan çox alim iştirak etdi.