Xəzər Universitetinin 35 illik yubileyi çərçivəsində Dillər və ədəbiyyatlar departamentinin təşkilatçılığı ilə 2026-cı il  fevralın 18-də  Beynəlxalq Ana Dili Gününə həsr olunmuş “Azərbaycan dilinin funksionallığı: müasir yanaşmalar” mövzusunda elmi seminar keçirilib. Seminar  müzakirə formatında təşkil olunub.

Tədbirin moderatoru, Dillər və ədəbiyyatlar departamentinin müdiri Dos. Dilbər Zeynalova Beynəlxalq Ana Dili Gününün əhəmiyyətindən, ana dilinin milli kimliyin və mədəni yaddaşın əsas dayağı kimi rolundan bəhs edib. O, tədbirin Xəzər Universitetinin 35 illik yubileyi çərçivəsində keçirilməsinin xüsusi rəmzi məna daşıdığını bildirib. Azərbaycan dilinin universitetin bütün ixtisaslarında, milliyətindən asılı olmayaraq, bütün tələbələrə məcburi fənn olaraq tədris olunduğunu vurğulayıb. Nümunə olaraq,   Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının “Yaşamağa nə var ki?!” şeirinin əcnəbi tələbələrin ifasında hazırlanmış videoçarxı nümayiş olunub.

Tədbirdə AMEA Nəsimi adına Dilçilik İnstitutunun direktoru Prof. Nadir Məmmədli, Azərbaycan Respublikasının Medianın İnkişafı Agentliyinin icraçı direktorunun müavini, yazıçı-jurnalist Natiq Məmmədli və Azərbaycan Yazıçılar Birliyinin Yaradıcılıq məsələləri üzrə katibi, Azərbaycan Respublikasının Əməkdar mədəniyyət işçisi, yazıçı, kino-dramaturq, şair İlqar Fəhmi  iştirak ediblər.

Prof. Nadir Məmmədli “Alınma sözlərin dilə daxil olma prinsipləri” mövzusunda danışaraq, sözlərin alınma prinsipləri, lüğətlərin tərtibi meyarları və leksik sistemin zənginləşmə prosesi barədə fikirlərini bölüşüb. Natiq Məmmədli “Azərbaycan dilinin mediada təzahür formaları” mövzusunda rəqəmsal platformaların dilə təsiri, media mətnlərində norma məsələləri və jurnalist məsuliyyətindən danışıb. “Müasir dövrdə ədəbi dilin estetik-psixoloji təsirləri” mövzusundan söz açan İlqar Fəhmi ədəbi dilin obrazlılıq imkanları, poeziyanın dilə təsir mexanizmi və oxucu-mətn münasibətlərindən bəhs edib.

Sonra tələbə və müəllimlərin sualları ətrafında dil tədrisində mövcud problemlər, tezlik lüğətlərinin tərtibi prinsipləri, süni intellektin dilə təsiri, alınma sözlərin mövcud statusu, media diskursunda dilin inkişafı və tərcümə prosesinin ədəbi dilə təsiri kimi məsələlər ətraflı  müzakirə olunub.

Prof. Akad. Hamlet İsaxanlı mövzuya dilçilik, mətbuat və poeziya yönündən fikrini bildirib, ana dilinin həm elmi, həm də bədii müstəvidə qorunması və inkişaf etdirilməsinin vacibliyini vurğulayıb, qonaqlara və təşkilatçılara təşəkkür  edib.

Tədbirdə Xəzər Universitetinin Musiqi və incəsənət departamentinin müdiri, Əməkdar müəllim Zülfiyyə Sadıqovanın rəhbərliyi ilə universitetin Kamera orkestrinin konserti təqdim olunub.