2026-cı il fevralın 19 – da Xəzər Universitetinin Mərmər zalında Beynəlxalq Ana Dili Gününə həsr olunmuş “Kitablar ən yaxşı dostumdur-2” adlı tədbir keçirilib. Universitetin himni və kitablara həsr edilmiş videoçarxın nümayişi ilə başlayan tədbir, keçən il Beynəlxalq Kitab Bağışlama Günü münasibətilə təməli qoyulmuş ənənənin  davamı kimi yadda qalıb. Tədbiri açan Xəzər Universiteti Humanitar, təhsil və sosial elmlər fakültəsinin dekanı Dr. Milana Abbasova kitabın insan mənəviyyatındakı əvəzsiz rolundan və ana dilinin qorunmasının vacibliyindən bəhs edib.

Xəzər Universiteti Mədəni Antropologiya və Folklor İnstitutunun koordinatoru (Xəzər MAFİ), Dos. Aynur Qəzənfərqızı ana dilinin saflığının qorunması və folklorun gənc nəslə aşılanmasının əhəmiyyətini vurğulayıb. Mirvarid Dilbazi Poeziya Məclisi İctimai Birliyinin rəhbəri və Kalağayı Muzeyinin direktoru Güllü Eldar Tomarlı milli geyim və poeziyanın vəhdətindən söz açaraq, mütaliənin şəxsiyyət kimi formalaşmadakı əhəmiyyətinə toxunub. Tanınmış tədqiqatçı Əli Şamil öz çıxışında kitabın keçmişlə gələcək arasında mənəvi körpü olduğunu qeyd edib, görkəmli yazıçı Əzizə Cəfərzadənin oğlu Turan İbrahimov isə anasının yaradıcılıq yolundan və kitabın bir ümman kimi insan xəyallarını zənginləşdirməsindən danışıb.

Tədbir çərçivəsində Dos. Aynur Qəzənfərqızının rəhbərliyi ilə keçirilən “Mütaliə Paneli”ndə şairlər – Tərlan Musayeva, Vaqif Osmanlı, Sevil Hüseynova, Lalə İsmayıl, Aybəniz Camalova, Esmira Fuad, Mətanət Ulu Şirvanlı, Əzizə Ağahüseynqızı, Qulu Xaləddinoğlu və Rövşən Xaləddinoğlu iştirak edərək, tələbələrlə yaxından ünsiyyət qurublar.

Tədbirin ən maraqlı və interaktiv məqamı olan sorğuda Dos. Aynur Qəzənfərqızının suallarını doğru cavablandıran tələbələrə Prof. Akad. Hamlet İsaxanlının müəllifi olduğu kitablar hədiyyə edilib. Proqramın sonunda şairlər həm tələbələrə, həm də Xəzər Universitetinin kitabxanasına öz kitablarını bağışlayıblar.

Tədbirdə universitetin qızlardan ibarət rəqs qrupu və universitetin müəllimi, tanınmış aşıq Ramin Qarayev çıxış ediblər.

Nigar Ələsgərli

Xəzər Universiteti, Azərbaycan dili və ədəbiyyatı müəllimliyi ixtisası üzrə 2-ci kurs tələbəsi.