Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB)  təşkilatçılığı ilə 2026-ci il fevralın 17-də Bakının Xətai rayonundakı 56 nömrəli tam orta məktəbdə “Narkomaniyaya yox deyək!” mövzusunda maarifləndirici seminar keçirilib.

Seminarda Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov maddə asılılığının yaranma mexanizmlərindən və bu prosesə təsir göstərən risk faktorlarından danışıb.  Qeyd edib ki, asılılıq təkcə fərdi zəiflikdən qaynaqlanmır, əksinə, bioloji, psixoloji və sosial amillərin qarşılıqlı təsiri nəticəsində yaranır. Psixoloqun sözlərinə görə, uşaqlıq dövründə yaşanan mənəvi travmalar, valideyn nəzarətinin zəifliyi, ailədaxili münaqişələr və emosional laqeydlik gələcəkdə asılılıq riskini artıran əsas səbəblər sırasındadır. M. Muxtarov vurğulayıb ki, psixoloji baxımdan aşağı özünəqiymət, depressiv hallar, təşviş pozuntuları və stresslə mübarizə bacarıqlarının zəif olması da asılılığın formalaşmasına təsir edir.  O bildirib ki, problemin qarşısının alınması üçün erkən diaqnostika, psixoloji dəstək proqramları, valideyn maarifləndirilməsi və məktəblərdə preventiv tədbirlərin gücləndirilməsi vacibdir. Sağlam sosial mühitin formalaşdırılması və gənclərdə stressin sağlam yollarla idarə olunması bacarıqlarının inkişafı isə asılılıq riskinin azalmasında əsas istiqamətlərdən biridir.

Tədbirdə Bakı Şəhər Baş Polis İdarəsi  YYÇPİTB-nin  rəisi, polis polkovniki İbrahim İsmayılov, həmin bölmənin inspektorları- polis mayoru Afaq Əliyeva və polis baş leytenantı Aysel Hacıyeva, Bakı Narkoloji Mərkəzin narkoloqu Günay Əsgərova iştirak ediblər.

Tədbir şagird və müəllim heyətinin fəal iştirakı ilə interaktiv şəkildə keçirilib, mövzu ətrafında geniş fikir mübadiləsi aparılib.