2016-cı il aprelin 9-da Xəzər Universitetinin koordinator olduğu “Avropa Birliyi araşdırmaları üzrə kurrikulumların işlənib hazırlanması və qabiliyyətlərin inkişaf etdirilməsi” (Curriculum Development and Capacity Building in the Field of EU Studies) adlı Tempus layihəsi çərçivəsində yekun konfrans keçirildi. Layihənin koordinatoru Baba Bayramlı konfransı giriş sözü ilə açaraq bütün tərəfdaş universitetlərə uğurlu birgə fəaliyyət üçün təşəkkür etdi. Xəzər Universitetinin rektoru Dr. Hassan Niknafs bütün iştirakçıları səmimi salamlayaraq, Xəzər Universitetinin layihə çərçivəsində əməkdaşlıqdan məmnun qaldığını ifadə etmiş və əməkdaşlığın gələcəkdə də davam etdirilməsinin zəruri olduğunu bildirdi. Erasmus+ ofisinin Azərbaycan Milli Ofisisnin rəhbəri Pərviz Bağırov iştirakçıları layihə çərçivəsində fəaliyyətlərin başa çatması münasibətilə təbrik etdi, baş tutmuş əməkdaşlığın gələcəkdə davam etdirilməsinin vacibliyini vurğuladı və bu işdə Erasmus+ ofisinin yardımçı olmağa hazır olduğunu bildirdi.

Baba Bayramlı “Avropa Birliyi araşdırmaları üzrə kurrikulumların işlənib hazırlanması və qabiliyyətlərin inkişaf etdirilməsi: layihənin nəticələri və gələcək əməkdaşlığın perspektivləri” mövzusunda geniş təqdimatla çıxış etdi. Tərəfdaş universitetlərin nümayəndələri Agostino Massa (İtaliyanın Genuya Universiteti), Bəxtiyar Bədəlov (Azərbaycan Universiteti), Seyid Sura (Naxçıvan Dövlət Universiteti), Ruslan Məmmədov (Gəncə Dövlət Universiteti), İrina Kunina (Bakı Slavyan Universiteti), Fernanada Neutel (Portuqaliyanın Lusofona Humanitar və Texnologiya Universiteti), Leyla Cəfərova (Xəzər Universiteti) və Fərhad Hüseynov (Bakı Dövlət Universiteti) da təqdimatla çıxış edərək, layihə çərçivəsində təmsil etdikləri universitetlərin uyğun fəaliyyətləri haqqında məlumat verdilər.

Sonda layihənin nəticələrinə və gələcək əməkdaşlıq perspektivlərinə həsr olunmuş dəyirmi masa keçirildi.