Bakı, Azərbaycan – 2026-cı il fevralın 13-də Gəncə şəhərindəki “Bookzone” Kitab Evində Xəzər Universitetinin qurucusu, fizika-riyaziyyat elmləri doktoru, ictimai xadim Prof.Akad Hamlet İsaxanlının “Bu da bir həyatdır” kitabının təqdimatı və imza günü keçirildi. Tədbirdə Gəncə Şəhər İcra Hakimiyyətinin nümayəndələri, Xalq artisti Şahnaz Haşımova, yazıçı Nüşabə Məmmədli, Xəzər Universitetinin rektoru Dr. Raziyə İsayeva, “Dünya” Məktəbi MMC-nin direktoru, Xəzər Universiteti Direktorlar və Qəyyumlar Şurasının üzvü Aygün Gardiner, Kitabxana - İnformasiya Mərkəzinin direktoru Aytac Misgərli, Karyera və Məzunlar Mərkəzinin direkoru Zərifə Əliyeva, Keyfiyyətin Təminatı Mərkəzinin direktoru Lyudmila Sotova, Dillər və ədəbiyyatlar departamentinin müdiri Dilbər Zeynalova, Gəncə “Dünya” məktəbinin direktoru Vahid Həsənov, Gəncə Dövlət Pedaqoji Universitetinin əməkdaşları, şəhərin müxtəlif təhsil və mədəniyyət müəssisələrinin təmsilçiləri, çoxsaylı ziyalılar, dövlət qurumlarının nümayəndələri, Xəzər Universitetinin məzunları və tələbələr iştirak etdilər.

Tədbirin əsas məqsədi Prof.Akad. Hamlet İsaxanlının elmi, ədəbi və ictimai fəaliyyətini oxuculara tanıtmaq, gənclər və ziyalılarla fikir mübadiləsi aparmaq idi.

“Dünya” Məktəbi MMC-nin direktoru, Xəzər Universiteti Direktorlar və Qəyyumlar Şurasının üzvü Aygün Gardiner açılış nitqi ilə çıxış edərək,  iştirakçıları salamladı, tədbir haqqında məlumat verdi.

Kitabxana - İnformasiya Mərkəzinin direktoru Aytac Misgərli Hamlet İsaxanlının kitabları haqqında ətraflı məlumat verdi. Dillər və ədəbiyyatlar departamentinin müdiri Dilbər Zeynalova Hamlet İsaxanların bədii əsərlərindən danışdı.

Xalq artisti Şahnaz Haşımova Hamlet İsaxanlının şeirlərini “Segah” muğamı üzərində böyük ustalıqla ifa etdi.

Yazıçı Nüşabə Məmmədli  Hamlet İsaxanlı və yaradıcılıq fəaliyyəti haqqında ürək sözlərini söylədi.

Tədbir zamanı Hamlet İsaxanlının müxtəlif illərdə işıq üzü görmüş elmi, publisistik və bədii əsərləri sərgiləndi.  Oxucular müəlliflə birbaşa ünsiyyət qurmaq, kitablarını imzalatmaq imkanı qazandılar. Yazıçının povest və hekayələri əsasında hazırlanmış səhnəciklər tamaşaçılar tərəfindən böyük maraqla qarşılandı. Şeirlərinin səslənməsi, sözlərinə bəstələnmiş mahnıların  ifa edilməsi də tamaşaçıların ürəyincə oldu.

Prof.Akad. Hamlet İsaxanlının mənalı və zəngin həyat yolu, elmi-ictimai fəaliyyəti, Azərbaycan təhsilinə və milli-mənəvi düşüncəyə verdiyi töhfələr barədə maraqlı və məzmunlu çıxışlar edildi.

Tədbirin sonunda Hamlet İsaxanlı “Bu da bir həyatdır” şeirini söylədi.