11 fevral 2026-cı il tarixində Bakıda Litva Respublikasının dövlət müstəqilliyinin bərpasının 108-ci ildönümü münasibətilə rəsmi tədbir keçirilib. Tədbir Beynəlxalq Muğam Mərkəzində təşkil olunub. Mərasimdə Xəzər Universitetinin rektoru Dr. Raziyə İsayeva, eləcə də universitetin müxtəlif struktur bölmələrinin rəhbərləri iştirak ediblər. Xəzər Universitetinin bu kimi beynəlxalq səviyyəli və diplomatik əhəmiyyətli tədbirlərdə təmsil olunması universitetin beynəlxalq əlaqələrinin genişləndirilməsi, xarici tərəfdaşlarla akademik və mədəni əməkdaşlığın dərinləşdirilməsi istiqamətində həyata keçirdiyi strateji xəttin tərkib hissəsidir.

Tədbirdə Azərbaycanın xarici işlər nazirinin müavini Fariz Rzayev, Azərbaycanda akkreditə olunmuş xarici ölkələrin səfirləri, diplomatlar, eləcə də ictimai-siyasi xadimlər iştirak ediblər. Rəsmi hissə Azərbaycan və Litva dövlət himnlərinin ifası ilə başlayıb.

Litvanın Azərbaycandakı səfiri Kestutis Vaşkeleviçus çıxış edərək, Litvanın müstəqillik yolu, milli iradə və ideoloji birliyin əhəmiyyəti barədə danışıb. O, müstəqillik ideyasının Azərbaycan və Litva xalqlarını birləşdirən ortaq dəyərlərdən biri olduğunu vurğulayıb və Məhəmməd Əmin Rəsulzadənin “Bir kərə yüksələn bayraq, bir daha enməz” fikrinə istinad edib.

Azərbaycanın xarici işlər nazirinin müavini Fariz Rzayev isə çıxışında Azərbaycan – Litva münasibətlərinin tarixi köklərə malik olduğunu, bu əlaqələrin Azərbaycan Xalq Cümhuriyyəti dövründən etibarən formalaşdığını qeyd edib və hazırda iki ölkə arasında siyasi, diplomatik və humanitar əməkdaşlığın uğurla inkişaf etdiyini bildirib.

Qeyd etmək lazımdır ki, Xəzər Universiteti ilə Azərbaycanda akkreditə olunmuş xarici ölkələrin diplomatik nümayəndəlikləri arasında formalaşmış əməkdaşlıq çərçivəsində səfirlər və diplomatik korpusun üzvləri universitetdə keçirilən elmi-akademik və ictimai tədbirlərdə mütəmadi olaraq yaxından iştirak edirlər. Bu əməkdaşlıq çərçivəsində diplomatlar Xəzər Universitetinin tələbələri üçün seminarlar, mühazirələr və tematik görüşlər keçirir, beynəlxalq münasibətlər, diplomatiya, qlobal proseslər və mədəniyyətlərarası dialoq mövzularında bilik və təcrübələrini bölüşürlər. Bu cür təşəbbüslər tələbələrin qlobal dünyagörüşünün formalaşmasına və universitetin beynəlxalq akademik mühitlə daha sıx inteqrasiyasına mühüm töhfə verir.

Tədbir çərçivəsində tanınmış caz musiqiçisi Salman Qəmbərov və onun rəhbərlik etdiyi “Bakustik-caz” qrupunun ifasında təqdim olunan musiqi proqramı mərasimə xüsusi rəng qatıb.

Xəzər Universiteti gələcəkdə də bu kimi beynəlxalq və diplomatik platformalarda fəal iştirak etməklə, xarici tərəfdaşlarla əməkdaşlığın genişləndirilməsinə və tələbələrin beynəlxalq təcrübə qazanmasına yönəlmiş fəaliyyətini davam etdirməyi qarşısına məqsəd qoyur. ‎