2026-cı il fevralın 9-da Xəzər Universiteti Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov REAL TV-nin efirində yayımlanan “Problem” proqramında çıxış etmişdir. Psixoloq veriliş zamanı uşaqlarda və yeniyetmələrdə telefon və oyun asılılığı, valideyn nəzarətinin rolu mövzusunda danışmışdır.

O vurğulamışdır ki, xüsusilə bu yaş qruplarında sərt qadağalar təkbaşına çıxış yolu hesab oluna bilməz. Psixoloqun sözlərinə görə, qadağalar uşaqlarda gizli istifadə davranışına və valideynlərdən uzaqlaşmaya səbəb ola bilər. Bu zaman uşaqlar valideynləri ilə paylaşım etmədən telefon və oyunlardan istifadəni davam etdirə bilərlər. Psixoloq qeyd etmişdir ki, uşağın oyuna və ya telefona meyilliliyi çox zaman real həyatda diqqət, sevgi, dinlənilmə və dəyərli hiss etmə kimi ehtiyacların qarşılanmaması ilə əlaqədardır. Bu baxımdan valideynlərin əsas vəzifəsi problemi qadağa ilə deyil, səbəbləri anlamaqla həll etməyə çalışmaqdır.

Mirsadiq Muxtarov uşaqlara nəzarətin yaşa uyğun şəkildə həyata keçirilməsinin vacibliyini vurğulamış, ekran vaxtının müəyyən olunmasının, xüsusilə yeniyetməlik dövründə mühüm əhəmiyyət daşıdığını bildirmişdir. Psixoloq, həmçinin sosial öyrənmə nəzəriyyəsinə istinad edərək valideynlərin öz davranışları ilə övladlarına rol model olduqlarını qeyd etmişdir. O, valideynlərin özlərinin telefon istifadəsinə diqqət yetirməsinin uşaqlarda sağlam davranışların formalaşmasında mühüm rol oynadığını xüsusi olaraq vurğulamışdır.

Canlı yayımın tam versiyasını aşağıdakı linkə keçid edərək izləyə bilərsiniz:
https://youtu.be/cyk6dsn8Xb8?si=1gIDtFAJbo_QgSOA