2026-cı il fevralın 10-da Xəzər Universiteti Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov “Demokrat.az” xəbər saytına müsahibə vermişdir. Psixoloq Bakıda azyaşlıya qarşı baş vermiş ailədaxili zorakılıq faktı fonunda uşaqlara qarşı fiziki və cinsi istismarın psixoloji tərəfləri və profilaktik maarifləndirmənin əhəmiyyəti barədə danışmışdır.

O bildirib ki, fiziki zorakılıq uşağa ağrı və zərər yetirən hər cür davranışı əhatə edir və heç bir halda tərbiyə vasitəsi hesab oluna bilməz. Psixoloqun sözlərinə görə, fiziki zorakılığa məruz qalan uşaqlar qorxu, utanc və günahkarlıq hissi yaşadıqları üçün baş verənləri gizlətməyə çalışırlar ki, bu da zorakılığın davam etməsinə şərait yaradır. Bədəndə izahı olmayan göyərmələr, tez-tez zədələnmələr, qorxu içində davranış və həddindən artıq itaətkarlıq fiziki istismarın əlamətləri ola bilər və belə hallarda müvafiq qurumlara vaxtında məlumat verilməlidir.

Mirsadiq Muxtarov qeyd edib ki, cinsi istismar hallarında uşaqlara yaş səviyyəsinə uyğun şəkildə “bədən toxunulmazlığı” anlayışı izah edilməlidir. Uşaq bilməlidir ki, onun bədəni ona məxsusdur və istəmədiyi fiziki toxunuşlara məcbur edilə bilməz. Psixoloq vurğulayıb ki, uşaqlara təhlükəli davranışları gizlətməmək, narahatlıq yaradan hallarla bağlı məktəb psixoloquna, müəllimlərə və hüquq-mühafizə orqanlarına müraciət etmək aşılanmalıdır.

Müsahibənin tam versiyası aşağıdakı linkdə:

https://demokrat.az/az/news/268412/usaq-bilmelidir-ki-bedeni-ona-mexsusdur