2026-cı il fevralın 7-də Xəzər Universitetinin Bəşir Səfəroğlu kampusunda görkəmli riyaziyyatçı alim, pedaqoq, yazıçı və publisist İsmixan Yusubovun 80 illik yubileyi münasibətilə çapdan çıxmış “İsmixan Məhəmməd oğlu Yusubov – Yada düşən adam” kitabının təqdimatı keçirildi. Tədbirdə  universitetin rəhbərliyi və əməkdaşları, İsmixan Usubovun tələbə yoldaşları və tələbələri, müxtəlif bölgələrdən olan ziyalılar iştirak edirdilər.

Tərtibçisi Soltan Həmid Hilal oğlu Melikov, redaktoru İsmixan Yusubov olan kitab “Redaktor – yubilyardan və ya yubilyar – redaktordan” adlı ön sözlə açılır və “Azərilərdən gələnlər”, “Türkiyədən gələnlər” “Rus dilində gələnlər”, “Təbriklər”, “Yubilyardan”, “Yubilyardan düşüncələr” və “Yubilyarla bağlı albom” bölmələrindən ibarət olmaqla dərin məzmunu və janr etibarilə orijinallığı ilə diqqəti çəlb edir.

Tədbiri İsmixan Yusubov açaraq, iştirakçıları salamladı və aparıcı vəzifəsini də öz üzərinə götürdü. Çıxış edənlər –Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, Fuad Vəliyev, Qurban Qasımov, Tünzalə Bayramova, Nəriman Qasımzadə, “Xəzər Xəbər” jurnalının baş redaktor müavini Əlirza Balayev, Azad Tağızadə, Soltan Həmid, Xəzər Universitetinin  İctimai Əlaqələr və Media üzrə direktoru Əlövsət Əmirbəyli   və digərləri İsmixan Yusubovun alim,  pedaqoq, yazıçı və publisist kimi çoxşaxəli fəaliyyətindən söz açdılar, xatirələrini söylədilər.

Sonda İsmixan Yusubov tədbirin təşkilatşısı olan Xəzər Universitetinə və iştirakçılara təşəkkürünü bildirdi, xatirə şəkilləri çəkildi.