Xəzər Universitetinin İngilis dili və ədəbiyyatı departamentinin müəllimi Bibixanım Səmədova British Council tərəfindən təşkil edilən "Researcher Connect " peşəkar inkişaf proqramını uğurla başa vuraraq, sertifikatla təltif olunmuşdur.

Proqram çərçivəsində keçirilən təlimlər British Council tərəfindən dəvət olunmuş təcrübəli böyük britaniyalı təlimçilər - Sandy (Dicks) Sparks və Stella Mascarenhas-Keyes tərəfindən aparılmışdır.

Proqramın başa çatması münasibətilə sertifikatların təqdimetmə mərasimi Britaniya və Şimali İrlandiya Birləşmiş Krallığının Azərbaycandakı səfirliyinin iqamətgahında 2026-cı il yanvarın 15-də keçirilmişdir. Tədbirdə fövqəladə və səlahiyyətli səfir Fergus Auld və British Council-in Azərbaycan üzrə ölkə direktoru Nərgiz Hacıyeva  universitetin müəllimi Bibixanım Səmədovanı bu nailiyyəti münasibətilə təbrik etmişlər.

Proqram çərçivəsində Bibixanım Səmədovanın “Xarici dillərin öyrənilməsində müxtəlif pedaqoji yanaşmalar” adlı tədqiqat işi müxtəliflik prinsipi əsasında formalaşdırılmış 30 nəfərlik auditoriyanın marağına səbəb olmuşdur.

Bu nailiyyət Bibixanım Səmədovanın şəxsi uğuru olmaqla yanaşı, eyni zamanda Xəzər Universitetinin qlobal akademik tədqiqatlarda və beynəlxalq elmi platformalarda fəal iştirakını nümayiş etdirir.