2025-ci il dekabrın 22-də Azərbaycan Dövlət Pedaqoji Universitetinin (ADPU) Quba filialında keçirilən “Hüseyn Əfəndi Qayıbzadə irsi – ənənə və maarifçilik kontekstində” mövzusunda respublika elmi konfransında Xəzər Universiteti tərəfdaş və fəal iştirakçı qismində təmsil olunub.

XIX əsr Azərbaycan maarifçiliyinin görkəmli nümayəndəsi Hüseyn Əfəndi Qayıbzadənin zəngin elmi-pedaqoji irsinin yenidən dəyərləndirilməsinə həsr olunmuş konfransın əsas məqsədi onun milli təhsil sisteminin formalaşmasındakı rolunu, maarifçilik ideyalarının müasir elmi yanaşmalarla səsləşməsini və aktual elmi-pedaqoji əhəmiyyətini üzə çıxarmaq idi.

Şərqşünas alim, ADPU-nun Quba filialının baş müəllimi Seyid Cabbarovun moderatorluğu ilə aparılan tədbiri giriş sözü ilə ADPU-nun Quba filialının direktoru Prof. Yusif Əliyev açıb. O, Hüseyn Əfəndi Qayıbzadənin maarifçilik ideyalarının bu gün də aktuallığını qoruduğunu vurğulayıb, bu cür elmi tədbirlərin milli-mədəni yaddaşın qorunması baxımından əhəmiyyətini qeyd edib.

Plenar iclasda bir çox elm xadimi və ziyalılarla birlikdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı da çıxış edərək, Qayıbzadə irsinin tarixi, elmi və mədəni əhəmiyyətinə dair fikirlərini bölüşüb. Natiq çıxışında Hüseyn Əfəndi Qayıbzadənin şəxsiyyəti və dünyagörüşünü tarixi-mədəni kontekstdə təhlil edərək, onun ilahiyyatçı kimliyi ilə maarifçi düşüncə tərzini ideal şəkildə birləşdirən nadir ziyalılardan biri olduğunu vurğulayıb. O, Qayıbzadənin cəmiyyətin inkişafında təhsilin həlledici roluna inamını xüsusi qeyd edib, onun qadınların maariflənməsi və sosial inkişafı məsələsinə verdiyi yüksək dəyəri XIX əsr üçün olduqca qabaqcıl və cəsarətli mövqe kimi qiymətləndirib.

Sonra başlanan panel müzakirələrdə Xəzər Universitetinin Dillər və ədəbiyyatlar departamenti əsas təmsilçi qurumlardan biri kimi iştirak edib. Departamentin müdiri Dos. Dilbər Zeynalovanın rəhbərliyi ilə departamentin əməkdaşları olan Dos. Zivər Hüseynli Baylan, filologiya üzrə  fəlsəfə doktorları Almaz Bədəlova, Yeqzar Cəfərli, Könül Həsənova, Gülşanə Xudiyeva, Aygül Qurbanova, həmçinin Mənsurə Əhmədova və Fərqanə Ələsgərli tədbirdə əyani və onlayn formatda elmi məruzələrlə çıxış edib, Hüseyn Əfəndi Qayıbzadənin pedaqoji irsi, ana dilində təhsil konsepsiyası, maarifçilik baxışlarının müasir dilçilik və təhsil nəzəriyyələri ilə əlaqəsini müxtəlif elmi aspektlərdən əsaslandırıblar.

Konfransın bədii hissəsində Xəzər Universitetinin Kamera orkestrinin ifasında səsləndirilən müxtəlif musiqi nümunələri tədbirə xüsusi estetik ovqat bəxş edib. Orkestrin bədii rəhbəri Xəzər Universitetinin Musiqi və incəsənət departamentinin müdiri, pianoçu Dos. Züffiyyə Sadıqova, dirijoru Hüseyn Muradov olub. Vokal ifaları universitetin müəllimi Məhsəti Cabbarova və Asim Muradov təqdim edib, saz ifaçısı isə müəllim Ramin Qarayev olub.

Respublika elmi konfransı Xəzər Universiteti əməkdaşlarının milli maarifçilik irsinin araşdırılması və təbliği istiqamətində apardığı elmi fəaliyyətin təqdimatı baxımından əhəmiyyətli olub, ali təhsil müəssisələri arasında elmi əməkdaşlığın genişlənməsinə töhfə verib.