Xəzər Universitetinin Siyasi elmlər və fəlsəfə departamentinin təşkilatçılığı ilə 2025-ci il dekabrın 22-24-də Khazar Talks-3 layihəsi çərçivəsində akademik seminar keçirilmişdir. Seminarlar zamanı Türkiyənin Qalatasaray Universitetinin Strateji Araşdırmalar Mərkəzinin müdiri, Dos. Tolga Bilener “Çinin xarici siyasəti: konsepsiyalar, aktorlar və regional dinamikalar” mövzusunda silsilə mühazirələrlə çıxış etmişdir. Tədbir universitet rəhbərliyi, professor-müəllim heyəti və tələbələr tərəfindən böyük maraqla qarşılanmışdır.

Qeyd edək ki, Khazar Talks layihəsi Siyasi elmlər və fəlsəfə departamenti tərəfindən ilk dəfə 2024-2025-ci tədris ilində, ikinci dəfə isə bu ilin dekabr ayında təşkil olunmuşdur. Layihə çərçivəsində səfirlərlə görüşlərin, akademik seminarların və kitab təqdimatlarının keçirilməsi nəzərdə tutulur.

Seminarın ilk günü Dos. Tolga Bilener “Çin xarici siyasətinin əsasları və parametrləri” (“Foundations and Parameters of Chinese Foreign Policy”) mövzusunda çıxış etmişdir. Bu sessiyada Çin xarici siyasətinin tarixi, ideoloji və institusional təməlləri ətraflı şəkildə izah edilmiş, xüsusilə “alçaldılma əsri”nin (XIX-XX əsrlər) Çin strateji düşüncəsinə təsiri, Mao Tszedun və Denq Syaopin`in siyasi irsi, eləcə də 1978-ci ildən sonrakı islahatların xarici siyasətə təsiri vurğulanmışdır.

 Dekabrın 23-də “ABŞ-Çin münasibətləri: rəqabət, qarşılıqlı asılılıq və strateji mübarizə” (“US–China Relations: Rivalry, Interdependence, and Strategic Competition”) və “Çin-Türkiyə münasibətləri: strateji ambivalentlik və praqmatik əməkdaşlıq” (“Sino-Turkish Relations: Strategic Ambivalence and Pragmatic Engagement”) mövzularında mühazirələr təqdim olunmuşdur. İlk sessiyada ABŞ-Çin münasibətlərinin tarixi inkişaf mərhələləri və müasir dövrdə artan strateji rəqabət təhlil edilmiş, 1972-ci il yaxınlaşmasından başlayaraq münasibətlərin necə rəqabət müstəvisinə keçdiyi izah olunmuşdur. Növbəti sessiyada isə Çin-Türkiyə münasibətlərinin tarixi, iqtisadi və geosiyasi aspektləri araşdırılmış, Osmanlı dövründən bu günə qədər əlaqələrin məhdud, lakin tədricən inkişaf edən xarakteri qeyd edilmişdir.

Seminarın son günü “Çinin Mərkəzi Asiya və Qafqazda iştirakı”  (“China’s Engagement in Central Asia and the Caucasus”) mövzusuna həsr edilmişdir. Bu sessiyada Çinin Avrasiya məkanındakı strateji maraqları, xüsusilə enerji təhlükəsizliyi, Sincan bölgəsinin sabitliyi və quru nəqliyyat əlaqələrinin əhəmiyyəti diqqət mərkəzində olmuşdur.

Hər bir seminardan sonra Dos. Tolga Bilener iştirakçıların suallarını cavablandırmış və mövzular ətrafında geniş müzakirələr aparılmışdır. Tədbirin sonunda Xəzər Universitetinin rektoru Dr. Raziyə İsayeva Tolga Bilener`ə universitet adından xatirə hədiyyəsi və plaket təqdim etmişdir. Seminar iştirakçıların birgə xatirə fotosu çəkdirməsi ilə yekunlaşmışdır.