Xəzər Universitetində 2025-ci il dekabrın 18-də “Uzaq Şərqin səsləri: kitablar və mədəniyyət” adlı mədəni-maarifləndirici tədbir keçirildi. Universitetin Kitabxana-İnformasiya Mərkəzinin təşkilatçılığı ilə baş tutdu və Yaponiya mədəniyyətinin, ədəbiyyatının və kitab irsinin tanıdılmasına həsr olundu. Tədbirin moderatoru universitetin Beynəlxalq əlaqələr şöbəsinin əməkdaşı Jalə Məmmədova idi.

Tədbir Xəzər Universitetinin Kamera Orkestrinin ifasında musiqi proqramı ilə açıldı. Ardınca moderator açılış nitqi üçün sözü Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlıya verdi. Hamlet İsaxanlı çıxışında tədbirin əhəmiyyətini vurğulayaraq, mədəniyyətlərarası dialoqun, kitab mübadiləsinin mühüm rolundan və Yaponiya universitetləri ilə mövcud əməkdaşlığın davam etdirilməsinin vacibliyindən bəhs etdi. Yaponiyanın Azərbaycan Respublikasındakı fövqəladə və səlahiyyətli səfiri Vatanabe Katsuya çıxış edərək, iki ölkə arasında mədəni və akademik əməkdaşlığın inkişaf perspektivlərini diqqətə çatdırdı. 

Növbəti çıxışda Xəzər Universitetinin Təbiət elmləri, sənət və texnologiya  yüksək təhsil fakültəsinin dekanı Günel Bahəddinova Xəzər Universiteti haqqında təqdimatla  çıxış etdi.

Tədbir çərçivəsində Nippon Fondunun sədri Yohei Sasakava`nın məktubu ingilis və Azərbaycan dillərində oxundu. Ardınca Yaponiyanın Azərbaycandakı səfirliyinin Mədəniyyət və informasiya departamentinin diplomatı Tsuçiya Tayci “Yapon dilinin ifadəliliyi” mövzusunda çıxış etdi.

Xəzər Universitetinin Kitabxana-İnformasiya Mərkəzinin direktoru Aytac Misgərli çıxış edərək, Nippon Fondu tərəfindən universitetə hədiyyə olunan kitabların əhəmiyyətindən, bu nəşrlərin kitabxananın çoxsaylı istifadəçiləri üçün mühüm elmi və mədəni mənbə olacağından danışdı. O, gələcək əməkdaşlığın davamlı olacağına ümidvar olduğunu bildirərək, Nippon Fonduna, Yaponiyanın Azərbaycandakı səfirliyinə və bu əməkdaşlıqların inkişafına verdiyi dəstəyə görə Hamlet İsaxanlıya dərin təşəkkürünü ifadə etdi.

Tədbirin sonunda Nippon Fondu tərəfindən hədiyyə olunan kitab sərgisinə baxış keçirildi.

Tədbir Yaponiyaya məxsus zəngin elmi və mədəni irsin tanıdılması, oxu mədəniyyətinin təşviqi və mədəniyyətlərarası əlaqələrin möhkəmləndirilməsi baxımından iştirakçılar tərəfindən böyük maraqla qarşılandı.