Xəzər Universitetinin Karyera və Məzunlar Mərkəzinin təşkilatçılığı ilə 2025-ci il dekabrın 12-də AIESEC Azərbaycan təşkilatının nümayəndələri ilə tələbələrin görüşü keçirilmişdir. Görüş universitetin Neftçilər, Nərimanov və Bakıxanov kampuslarında təşkil olunmuşdur.

Tədbir çərçivəsində tələbələr AIESEC-in təqdim etdiyi beynəlxalq proqramlar, gənclər üçün yaradılan inkişaf platformaları və xaricdə təcrübə imkanları haqqında geniş məlumat əldə etmişlər. Görüşün əsas məqsədi gənclərin liderlik potensialını üzə çıxarmaq, onların fərdi və peşəkar inkişafına dəstək olmaq, həmçinin sosial fəallıq və layihə idarəçiliyi sahəsində biliklərini artırmaq olmuşdur. Eyni zamanda, bu cür görüşlər tələbələrin karyera planlamasında daha düzgün seçim etmələrinə və qlobal əmək bazarına inteqrasiyasına dəstək göstərir.

AIESEC Azərbaycan nümayəndələri tərəfindən “Global Volunteer”, “Global Teacher” və “Global Talent” proqramları təqdim edilmiş, bu təşəbbüslərin gənclərə müxtəlif ölkələrdə praktiki təcrübə qazanmaq, yeni mədəniyyətlərlə tanış olmaq və cəmiyyətə fayda vermək imkanı yaratdığı qeyd olunmuşdur.

Tədbir çərçivəsində tələbələr üçün ilkin müraciət mərhələsi və seçim prosesi haqqında da praktiki tövsiyələr paylaşılıb.

Təqdimat zamanı layihə menecerləri Zeynəb Babayeva, Fatimə Novruzova, Alişan Abdurrahmanov proqramların məqsədləri, müraciət qaydaları və iştirakçılar üçün açılan perspektivlər barədə ətraflı məlumat vermiş, tələbələrin ünvanladığı sualları cavablandırmışlar.