Xəzər Universitetinin Kitabxana-İnformasiya Mərkəzinə BP-nin təşəbbüsü və maliyyə dəstəyi ilə TEAS Press Nəşriyyat Evində hazırlanaraq nəşr edilmiş 250 nüsxədən ibarət yüksək elmi və metodoloji əhəmiyyətə malik dərslik və tədris vəsaitləri hədiyyə olunmuşdur.

Bu təşəbbüs universitetdə biznes və iqtisadiyyat elmləri üzrə tədrisin elmi bazasının gücləndirilməsi və tələbələrin müasir akademik ədəbiyyata çıxış imkanlarının artırılması baxımından mühüm dəyər kəsb edir.

Ümumilikdə  bu nəşrlər universitetdə iqtisadiyyat, biznes, maliyyə, menecment və tətbiqi statistika sahələrində təhsil alan tələbələrin, həmçinin bu istiqamətlərdə fəaliyyət göstərən tədqiqatçı və müəllim heyətinin elmi-pedaqoji fəaliyyətinin daha effektiv təşkilinə xidmət edəcəkdir.

Sözügedən kitablar müasir iqtisadi nəzəriyyələrə, statistik metodologiyalara və idarəetmə strategiyalarına dair aktual bilikləri özündə cəmləyən, beynəlxalq standartlara uyğun hazırlanmış mənbələrdir. Onların kitabxana fonduna daxil edilməsi tədris prosesinin keyfiyyətinə, tədqiqat fəaliyyətinin genişlənməsinə və tələbələrin daha müasir elmi resurslara çıxış imkanlarının artırılmasına əhəmiyyətli töhfə verir.

 Xəzər Universiteti adından BP şirkətinə göstərilən dəstəyə görə təşəkkür edir, elm və təhsilin inkişafına yönəlmiş bu əməkdaşlığın gələcəkdə də davam edəcəyinə inanırıq.