2025-ci il noyabrın 28-də Xəzər Universitetinin Fizika və elektronika departamentində İspaniyanın Valladolid Universitetinin tədqiqatçısı Prof. Hassan Hassanabadi tərəfindən “İki Müxtəlif İzotrop Qaranlıq Maddə Halosunda Qara Dəliklərin Məkan-Zaman və Hissəcik Dinamikası” mövzusunda elmi seminar keçirilib.

Tədbirdə universitetin professor-müəllim heyəti, tədqiqatçılar və tələbələr iştirak ediblər. Prof. Hassanabadi çıxışında qara dəliklərin davranışı və onların müxtəlif astrofiziki mühitlə qarşılıqlı əlaqəsinin müasir elmin ən aktual və mürəkkəb tədqiqat istiqamətlərindən biri olduğunu, iki fərqli izotrop qaranlıq maddə halosunda qara dəliklərin məkan-zaman quruluşu və hissəcik dinamikasının nəzəri modellər əsasında necə dəyişdiyini ətraflı şəkildə izah edib. O, həmçinin, ən son elmi nəticələrə əsaslanaraq, qaranlıq maddənin qara dəliklərin fizikası ilə əlaqəsinə dair yeni yanaşmaların mümkün təsirlərini nəzərə çatdırıb.

Seminar interaktiv şəkildə davam edib, iştirakçılar mövzu ilə bağlı suallarını ünvanlayaraq, elmi müzakirələrdə fəallıq göstəriblər. Tədbir iştirakçılar tərəfindən böyük maraqla qarşılanıb və səmərəli elmi fikir mübadiləsi platforması kimi dəyərləndirilib.