Türkiyənin Qazi Universitetindən professor Muhittin Bilgili və professor Yergulu Bulut, həmçinin Akdeniz Universitetindən professor Sakine Gülfem Çakır Çelebi və professor Seval Apaydın Erasmus+ mübadilə proqramı çərçivəsində 2025-ci il noyabrın 17-21-də Xəzər Universitetində olublar.

Səfər çərçivəsində Muhittin Bilgili Təbiət elmləri və mühəndislik fakültəsinə, Yergulu Bulut İnformasiya texnologiyaları şöbəsinə, Sakine Gülfem Çakır Çelebi və Seval Apaydın isə Psixologiya departamentinə təhkim olunaraq, müxtəlif mövzularda seminar və görüşlər keçirmişlər.

Səfərin ilk günündə qonaqlara Xəzər Universitetinin Beynəlxalq əlaqələr şöbəsi tərəfindən universitetin tarixi, strukturu, fakültələri və beynəlxalq əməkdaşlıq istiqamətləri haqqında geniş məlumat təqdim olunub.

Mobillik proqramının mədəni hissəsi çərçivəsində professorların Atəşgah məbədinə ziyarəti təşkil edilib. Qonaqlar Azərbaycanın tarixi və dini irsi ilə yerindəcə tanış olmaq imkanı əldə ediblər.

Xəzər Universiteti beynəlxalq əməkdaşlığın gücləndirilməsi və akademik təcrübə mübadiləsinin davamlı olaraq inkişaf etdirilməsi üçün bu kimi proqramların əhəmiyyətini yüksək qiymətləndirir.