2025-ci il noyabrın 25-də Xəzər Universitetinin İqtisadiyyat və menecment fakültəsində birinci kurs tələbələrinin iştirakı ilə hotelçilik sahəsində böyük təcrübəyə malik mütəxəssis, hazırda Kleindienst Group şirkətində Təlim və inkişaf direktoru vəzifəsində çalışan Vəfa Kərəmova ilə görüş keçirilib.

Vəfa Kərəmova hotelçilik sahəsində 12 ildən artıq iş təcrübəsinə sahibdir və 20-dən çox hotelin açılış prosesində iştirak edib. Görüş zamanı o, tələbələrə öz peşəkar inkişaf yolu, hotelçilik sektorunda topladığı praktiki biliklər və uzun illər ərzində formalaşdırdığı təcrübələr barədə danışıb. Qonaq, həmçinin, turizm sənayesində inkişaf perspektivləri, komanda idarəçiliyinin önəmi və müasir hotelçilik standartları haqqında fikirlərini bölüşüb.

Tədbir interaktiv sual-cavab sessiyası ilə davam edib və tələbələr tərəfindən böyük maraqla qarşılanıb. Sonda fənn müəllimi Könül Nuriyeva Vəfa Kərəmovaya təşəkkür edərək, bu kimi görüşlərin tələbələrin peşəkar inkişafına mühüm töhfə verdiyini vurğulayıb.