2025-ci il noyabrın 21-də Xəzər Universiteti Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov “Demokrat.az” xəbər saytına müsahibə vermişdir. Psixoloq yeniyetmələr arasında təsadüfi zorakılıq hallarının artması, riskli davranışların psixoloji səbəbləri və bu hadisələrin cəmiyyət üçün yaratdığı təhlükələrdən danışmışdır.

O bildirib ki, son günlər baş verən və “zarafat” adı altında törədilən bıçaqlanma hadisələri problemin nə qədər ciddi olduğunu göstərir. Psixoloqun sözlərinə görə, yeniyetməlik dövrü emosional dəyişikliklərin, kimlik axtarışının və özünü sübut etmə ehtiyacının gücləndiyi bir mərhələ olduğundan, bu yaş qrupunda riskli davranış modellərinə meyl daha yüksək olur. Mirsadiq Muxtarov qeyd edib ki, qərarvermə və impulsların tənzimi ilə bağlı beyin sahələrinin tam formalaşmaması düşünülməmiş addımlara gətirir. Bu səbəbdən bıçaq və digər təhlükəli əşyalar yeniyetmələrə bəzən “güc” və ya “cəsarət” simvolu kimi görünür.

Psixoloq həmçinin vurğulayıb ki, sosial şəbəkələrdə zorakılığın cazibədar göstərilməsi yeniyetmələrin aqressiv davranışa meylini artırır. Onun sözlərinə görə, “küçə mədəniyyəti”, “kriminal qəhrəmanlıq” və “güclü görünmək” kimi anlayışların romantikləşdirilməsi gənclərin davranış modellərinə təsir edir. Ailədə qayğı və emosional dəstəyin çatışmazlığı, eləcə də aqressiv mühitin mövcudluğu kriminal meyilliliyin əsas səbəblərindən biridir.

Mirsadiq Muxtarov yeniyetmələrdə riskli davranışın qarşısının alınması üçün çoxşaxəli profilaktik tədbirlərin vacibliyini də qeyd edib. O bildirib ki, məktəb psixoloqlarının fəaliyyəti gücləndirilməli, risk qrupundakı şagirdlərlə mütəmadi iş aparılmalı, polis orqanlarının maarifləndirici görüşləri artırılmalı və məktəblərdə çətin tərbiyə olunan şagirdlər üçün xüsusi müdaxilə proqramları tətbiq edilməlidir. Eyni zamanda valideyn tərbiyəsindəki boşluqlar aradan qaldırılmalı, ailələrlə bağlı maarifləndirmə və psixoloji dəstək proqramları genişləndirilməlidir.

Müsahibənin tam versiyası aşağıdakı linkdə:

https://demokrat.az/az/news/258538/zarafat-adi-altinda-tehluke-bicaq-silah-kimi-esyalar-onlara-guc-ve-ya-cesaret-simvolu-kimi-gorunur