2025-ci il noyabrın 12-16-da  Ankara Musiqi ve İncəsənət Universitetində (AMİU) “Üfüq Planlama Şəhər Orman Yaşam Atölyesi” layihəsi çərçivəsində “Sənət ve Şəhər: AMİU Kampüs Planlaması” adlı multidisiplinar məkan planlaşdırması təlimi keçirilib.

Noyabrın 12-də açılış tədbirində AMİU-nün prorektoru Prof. Dr. Zafer Kurtaslan, “Üfüq Planlama” şirkətinin qurucusu Dr. Nejla Kılınç, Prof. Dr. Güzin Ayrancıoğlu, SABAH qrupları İcra Komitəsinin rəhbəri Dos. Elza Səmədova və Türkiyədəki Azərbaycan Səfirliyinin Mədəniyyət Mərkəzinin rəhbəri Samir Abbasov çıxış edərək, layihənin əhəmiyyətini vurğulayıblar.

Beş gün davam edən təlim proqramı şəhər planlaşdırması, memarlıq və incəsənət arasında qarşılıqlı əlaqə yaratmağı, həmçinin gənc mütəxəssislər üçün yaradıcı əməkdaşlıq mühiti formalaşdırmağı hədəfləyib. Proqramda Orta Doğu Teknik Universiteti (ODTÜ), İstanbul Universiteti, Ankara Universiteti, Çankırı Karatekin Universiteti, Karabük Universiteti, Gazi Universiteti, Azərbaycan Memarlıq və İnşaat Universiteti, Azərbaycan Rəssamlıq Akademiyası və Xəzər Universitetini təmsil edən ümumilikdə 40 tələbə iştirak edib. Onlar şəhərsalma, kampus dizaynı, davamlı yaşıl sahələr, səs və rəng analizləri, urbanistik estetika və vizual sənətlər üzrə nəzəri və praktiki məşğələlərə cəlb olunublar.

Xəzər Universitetinin Memarlıq və dizayn departamentinin müəllimi Günay Məmmədova, həmçinin Memarlıq ixtisasının II kurs tələbələri - Cəfər Əliyev, Nihat Mustafazadə və Mehin Qəhrəmanzadə də proqramda iştirak ediblər.

Təlimlər Dr. Nejla Kılınç`ın rəhbərliyi ilə aparılıb və tələbələrə şəhərsalma, incəsənət və təbiətin inteqrasiyası istiqamətində praktiki biliklər qazandırıb. Proqramın sonunda komandalar AMİU kampusunun inkişafına dair innovativ planlama və dizayn layihələrini təqdim ediblər. Bağlanış mərasimində tələbələrin hazırladıqları işlər sərgi formatında nümayiş etdirilib və iştirakçılara sertifikatlar təqdim olunub.

Qeyd edək ki, “Dayanıqlı Şəhər Layihəsi”nin birinci mərhələsi (30 may - 3 iyun 2025-ci il) və ikinci mərhələsi (27-31 oktyabr 2025-ci il) Xəzər Universitetində keçirilmişdir.