Siyasi elmlər və fəlsəfə departamentinin müdiri Dos. Orxan Vəliyev bu il doqquzuncusu təşkil olunan və dünyanın nüfuzlu tədbirlərindən olan TRT World Forum 2025-də iştirak etmişdir. Forum TRT kanalının təşkilatçılığı ilə 2025-ci il 31 oktyabr - 1 noyabr tarixlərində keçirilərək, "Qlobal yenidənqurma: köhnə nizamdan yeni reallıqlara"  mövzusuna həsr olunmuşdur. Dos. Vəliyev Forumun ötən ilki səkkizinci sessiyasında da iştirak etmişdi. 

Forumun açılışı Türkiyə Respublikasının Prezidenti Rəcəb Tayyib Ərdoğanın dərin məzmunlu çıxışı ilə gerçəkləşmişdir. Prezident Ərdoğan çıxışında dünyanın hazırkı şərtlərindən dolayı dövlətlərin öz sərhədləri daxilində qapalı qalmaq haqqının və imkanının olmadığını ifadə etmişdir. Sonra xüsusi qonaqların nitqləri və tematik panellərlə davam edən forum dünyanın müxtəlif ölkələrindən olan mütəxəssisləri, siyasətçiləri və akademikləri bir araya gətirmişdir. Forumun ikinci günündə Türkiyənin xarici işlər naziri Hakan Fidanın iştirakı ilə mühüm müzakirələr aparılmışdır.

Dos. Orxan Vəliyev “Mədəni diplomatiya və ortaq kimlik Mərkəzi Asiyada: regional əlaqə və inteqrasiyaya aparan yollar" mövzusuna həsr olunmuş paneldə müzakirəçi (disscussant) qismində çıxış etmişdir. Dos. Vəliyev öz çıxışında İkinci Qarabağ müharibəsində əldə edilən nəticənin türk dövlətləri arasında mədəni birliyin formalaşdırılmasına təsirindən danışmışdır. Paneldə əsas çıxışçılar qismində Qırğızıstan Respublikasının keçmiş baş naziri Djoomart Otorbaev, keçmiş mədəniyyət naziri Azamat Zhamankulov, Türk Mədəniyyəti və İrsi Fondunun prezidenti Aktoty Raimkulova, Aİ-nın Mərkəzi Asiya üzrə xüsusi nümayəndəsi Eduards Stiprais və TÜRKSOY-un Baş Kâtibi Sultan Raev iştirak etmişdilər. 

Forum Türkiyə Radio və Televiziya qurumunun baş katibi Prof. Zahid Sobacının  nitqi ilə öz işini yekunlaşdırmışdır.

Keçid - https://www.trtworldforum.com/