Bakı Ekspo Mərkəzində 2025-ci il oktyabrın 14-16-da keçirilən 5-ci yubiley “Rebuild Karabakh” Beynəlxalq Sərgisi Qarabağ və Şərqi Zəngəzur iqtisadi rayonlarının bərpası, yenidən qurulması və sosial-iqtisadi inkişafına həsr edilmiş mühüm tədbir oldu.

Sərgidə dövlət qurumları, özəl sektor nümayəndələri və 17 ölkədən 290-dan çox şirkət iştirak edərək, regionun gələcəyi üçün ən son texnologiya və innovativ həlləri təqdim etdilər. Kənd təsərrüfatı və aqrar innovasiyalar sərginin əsas mövzularından biri idi.

Kənd Təsərrüfatı Nazirliyi və Aqrar İnnovasiya Mərkəzinin təşkilatçılığı ilə qurulan stendlərdə aqrar startaplar arasında Xəzər Universitetinin tələbələri – Egana Məmişova  (Kompüter mühəndisliyi, IV kurs),   Mehriban Hümbətzadə (Dizayn, II kurs) və   Nicat Vəliyev  (Kompüter elmləri, I kurs) “BeeLance: Arılar və təbiət üçün balanslaşdırılmış ağıllı mühit” adlı layihələri də nümayiş etdirilib. Layihə Xəzər Universiteti İnnovasiya Mərkəzinin koordinatoru Fariz Həsənlinin mentorluğu ilə hazırlanıb.

Tədbirin sonunda „Xəzər“in təmsilçiləri tədbir iştirakçıları ilə gələcək əməkdaşlıqlar haqqında müzakirələr aparıblar.