2025-ci il oktyabrın 20-də Xəzər Universiteti Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov APA TV-də “Xəbəraparan” televiziya proqramında çıxış etmişdir. Verilişdə bu dəfə “Vərdişlərin psixoloji əsasları və onların asılılıqdan fərqi” mövzusu müzakirə olunmuşdur. Proqramın məqsədi vərdiş və asılılıq anlayışları arasındakı elmi və praktik fərqləri aydınlaşdırmaq, eləcə də sağlam vərdişlərin formalaşmasında psixoloji yanaşmalar barədə maarifləndirmə aparmaq idi.

Çıxış zamanı Mirsadiq Muxtarov vərdiş və asılılıq anlayışları arasında olan əsas fərqləri vurğulamış, bu fərqləri həm psixoloji (təkrarlanan davranışın məqsədliliyi, habelə idarəolunma qabiliyyəti və funksionallığı baxımından), həm də nevroloji (beyin bölgələrinin iştirakı baxımından) aspektlərdən qeyd etmişdir.

Çıxışda psixoloq tərəfindən vərdişlərin necə formalaşdığına dair müasir elmi yanaşmalara və bu sahədə aparılmış tədqiqatlara istinad olunmuş, davranışın təkrar güclənməsi, mühit faktorlarının rolu və psixoloji müdaxilə metodları, xüsusilə koqnitiv-davranış terapiyası və motivasiya yönümlü terapevtik yanaşmalar barədə məlumat verilmişdir. Mirsadiq Muxtarov qeyd etmişdir ki, hər bir fərdin sağlam və funksional vərdişlər inkişaf etdirməsi həm psixi sağlamlıq, həm də həyat keyfiyyəti baxımından olduqca önəmlidir.

Çıxış aşağıdakı linkdə:
https://www.youtube.com/live/zv7l9sEb5yo?si=KlteKwkhFmHORJpx