Hörmətli İsmixan müəllim!

Sizi – Azərbaycanın  tanınmış riyaziyyatçı alimini, ən müxtəlif və aktual mövzularda yüksək səviyyəli orijinal ədəbi və publisistik əsərlərin müəllifini, “Xəzər Xəbər” – “Khazar Review” jurnalının Redaksiya heyətinin üzvünü 80 illik yubileyiniz münasibətilə səmimi-qəlbdən təbrik edir, Sizə cansağlığı, uzun ömür, çoxşaxəli fəaliyyətinizdə yeni uğurlar arzulayırıq.

Sizin riyaziyyatçı alim kimi ciddi axtarış və nəticələriniz sahə elminə layiqli töhfələr kimi yüksək qiymətləndirilir. Zəngin pedaqoji fəaliyyətiniz isə həm də uzun illər qardaş Türkiyənin təhsil sahəsində  çalışmağınızla əlamətdardır.

Əhatəli publisistik yaradıcılığınızda ölkə həyatına aid mövzuların araşdırılması ilə yanaşı, xarici vətəndaşlarla məktublaşma janrında qələmə aldığınız məqalələr və kitab Ermənistan-Azərbaycan, Dağlıq Qarabağ münaqişəsi ilə əlaqədar Azərbaycan həqiqətlərinin daha geniş ictimaiyyətə  çatdırılmasında böyük rol oynamışdır.

Yeni çapdan çıxmış iri həcmli “Ömrümə nur çiləyənlər” kitabınız tərtibinə, mövzu müxtəlifliyinə, yazı üslubuna görə və bütünlükdə janr zənginliyi etibarilə oxucuların dərin marağını qazanması ilə fərqlənir.

“Xəzər Xəbər” – “Khazar Review” jurnalının Redaksiya heyətinin üzvü kimi yazılarınız və tövsiyələrinizlə jurnalın daha maraqlı olmasına səy göstərirsiniz.

Hörmətli İsmixan müəllim!

Sizi yubileyiniz münasibətilə bir daha təbrik edir, yeni uğurlar arzulayırıq.

Prof.Akad Hamlet İsaxanlı

“Xəzər Xəbər” – “Khazar Review” jurnalının baş redaktoru