03 sentyabr 2025-ci il tarixindən etibarən Xəzər Universitetinin rektoru vəzifəsinə Raziyə İsayeva təyin edilib.

Raziyə İsayeva, PhD – təhsil, idarəetmə və layihə rəhbərliyi sahəsində 20 ildən artıq akademik və peşəkar təcrübəyə malikdir. O, strateji idarəetmə, akademik proqramların keyfiyyəti, kadrların inkişafı və donor əlaqələrinin qurulmasına rəhbərlik etmişdir.

Raziyə İsayeva təhsil sahəsində fəlsəfə doktoru elmi dərəcəsini Finlandiyanın Laplandiya Universitetində almışdır. Bununla yanaşı, doktorluq dərəcəsinin bir hissəsini İngiltərinin Middlesex Universitetində, digər hissəsini isə Estoniyanın Tallin Universitetində tamamlamışdır. Tədqiqatçı Raziyə İsayeva SCOPUS və Web of Science indeksli jurnallarda tələbələrin təhsil və təlim prosesində fəal iştirakı, keyfiyyət təminatı və ali təhsildə müvəffəqiyyət mövzularında məqalələrin müəllifidir.

Dr. İsayeva 2003-cü ildən etibarən Xəzər Universitetində MBA və magistr səviyyəsində dərs deyir (Menecment, İnsan Resurslarının İdarəolunması, Təşkilati Davranış və s.). O, İqtisadiyyat və menecement fakültəsinin dekanı, o cümlədən uzun müddət İnkişaf Direktoru vəzifəsində çalışmışdır. Bakalavr dərəcəsini Xəzər Universitetinin Beynəlxalq İqtisadi Münasibətlər ixtisası üzrə, MBA dərəcəsini isə Menecment üzrə tamamlamışdır. Bundan əlavə, ABŞ-ın George Washington Universitetindən Layihə İdarəçiliyi üzrə Magistr Sertifikatı almış, həmçinin Böyük Britaniya və ABŞ universitetlərində xüsusi təlimlər keçmişdir.

Dr. İsayeva Avropa İttifaqı və digər beynəlxalq təşkilatların layihələrinin hazırlanması və idarə olunması üzrə geniş təcrübəyə malikdir. O, PETRA ERASMUS+ (573630-EPP-1-2016-1-ES-EPPKA2-CBHE-JP) layihəsinin müəllifi və icraçısı olmuşdur (2016-2019). Bundan başqa, müxtəlif beynəlxalq və milli layihələrin müəllifi və rəhbəri qismində çıxış etmişdir.

O, Azərbaycanın müxtəlif şirkət və təşkilatlarında idarəçilik və insan resurslarının idarə olunması sahəsində uzunmüddətli təcrübə qazanmışdır.