Azərbaycan musiqi mədəniyyətinin görkəmli nümayəndəsi, Xalq artisti, Prezident təqaüdçüsü, Dövlət Mükafatı laureatı, Xəzər Universitetinin də müəllimi olmuş professor Arif İmran oğlu Babayev 2025-ci il avqustun 1-də vəfat edib.

Arif Babayev 1938-ci il mayın 16-da Ağdam rayonunun Sarıhacılı kəndində anadan olmuşdur.

1953–1957-ci illərdə Bakı Musiqi Texnikumunda, daha sonra isə Azərbaycan Dövlət Mədəniyyət və İncəsənət Universitetində təhsil almışdır. 1963-cü ildə Azərbaycan Televiziya və Radiosunun solisti kimi işə başlamış və qısa müddət ərzində şöhrət qazanmışdır. O, “Şur”, “Rast”, “Bayatı-Şiraz”, “Segah”, “Qarabağ şikəstəsi” kimi klassik muğamların mahir ifaçısı kimi tanınıb.

Arif Babayev uzun illər ərzində pedaqoji fəaliyyətlə də məşğul olmuş, Bülbül adına Orta İxtisas Musiqi Məktəbində, Azərbaycan Milli Konservatoriyasında və Xəzər Universitetində çalışaraq, muğam sənətinin yeni nəsil ifaçılarının yetişdirilməsində müstəsna rol oynayıb. Xəzər Universitetində çalışdığı uzun illər ərzində universitet kollektivinin və tələbələrinin sevimli müəllimi olmuş, sadə və təvazökar davranışına görə dərin rəğbət qazanmışdır. Son illər xəstəliyi dövründə universitet rəhbərliyi ustad sənətkarı ailəsində ziyarət etmiş, qayğılarına şərik olmuşdur.

Arif Babayevin çoxşaxəli yaradıcılığı, milli musiqimizin zəngin irsinin qorunub yaşadılması və inkişaf etdirilməsi sahəsində göstərdiyi xidmətlər Azərbaycan dövləti tərəfindən yüksək qiymətləndirilmişdir. O, Əməkdar artist, Xalq artisti fəxri adlarına, “Şöhrət”, “Şərəf” və “İstiqlal” ordenlərinə, Prezidentin fərdi təqaüdünə və bir çox digər mükafatlara layiq görülüb.

Böyük xanəndə, gözəl pedaqoq, əsl sənətkar və ziyalı insan Arif Babayevin parlaq xatirəsi onu tanıyanların və sevənlərin qəlbində daim yaşayacaq.

 Allah rəhmət eləsin!