Xəzər Universitetinin Təhsil Departamentinin koordinatoru və müəllimi Günay Qasımova 2025-ci il iyunun 23-27-də Türkiyənin Qazi Universitetinə işgüzar səfər etmişdir. Səfərin əsas məqsədi beynəlxalq akademik əməkdaşlığın gücləndirilməsi və qarşılıqlı təcrübə mübadiləsinin həyata keçirilməsi olmuşdur.

Səfər çərçivəsində Günay Qasımova Qazi Universitetinin Təhsil fakültəsinin müxtəlif bölmələrindən akademik heyətlə görüşlər keçirmişdir. O, Sinif müəllimliyi bölməsindən Prof. Dr. Rabia Sarıkaya, Prof. Dr. Kemal Öztemel, Prof. Dr. İsmail Karakaya, Məktəbəqədər təhsil bölməsindən Prof. Dr. Ebru Ersay, eləcə də Türk Dili və Sosial Elmlər Təhsili bölməsinin elmi rəhbəri, Coğrafiya müəllimliyi və sosial elmlər bölümündən Prof. Dr. Salih Şahin ilə görüşlərdə iştirak etmişdir.

Görüşlər zamanı Günay Qasımova Xəzər Universitetinin Təhsil departamentinin strukturu, fəaliyyəti və tədris olunan ixtisaslar barədə ətraflı təqdimatla çıxış etmiş, iştirakçıların suallarını ətraflı cavablandırmışdır. Eyni zamanda, departamentin koordinatoru səfər zamanı Prof. Dr. Salih Şahinin müşayiəti ilə Qazi Universitetinin kampusu və fakültələri ilə yaxından tanış olmuşdur.

Səfər iki universitet arasında gələcək əməkdaşlıq üçün zəmin yaratmaq baxımından əhəmiyyətli olmuşdur. Sonda Xəzər Universitetinin  Departament koordinatoruna işgüzar səfərə görə  sertifikat təqdim edilib.