2025-ci il iyulun 1-də Xəzər Universitetinin Memarlıq və dizayn departamenti Memarlıq, Dizayn və Təsviri incəsənət müəllimliyi ixtisasları tələbələrinin 2024-2025-ci tədris ilində  yerinə yetirdikləri dərs tapşırıqlarının və fərdi işlərinin sərgisi keçirildi.

Sərginin açılışında universitetin təsisçisi, Direktor və Qəyyumlar Şurasının sədri Prof.Akad. Hamlet İsaxanlı, Memarlıq və dizayn departamentinin müdiri Dos. Şəhla Abbasova çıxış etdilər. 

Sərgidə tələbələrin ekodizayn layihələri, ekosəmərəli, təkrar istehsala uyğun və məişət  tullantılarından hazırlanan “kollaj” kompozisiyaları, “Yaşıl Dünya” mövzusunda reklam plakatları, keramika məhsulları, memarlıq layihələri və maketlər, loqo və brendinqlər, rəsmlər, moda kollajları, yeni dizayn olunan ayaqqabılar yer aldı.

Sərginin diqqətçəkən hissələrindən biri də “Məhsul dizaynı” fənni çərçivəsində həyata keçirilən “Dəstək dizaynı” xeyriyyə layihəsi oldu. Fiziki məhdudiyyətli şəxslər üçün tələbələr tərəfindən dizayn edilən xüsusi mebellər “Greenwood” şirkətinin rəhbəri Fuad Nəcəfovun təşəbbüsü ilə istehsal olunaraq, Azərbaycan Respublikası Əlil Təşkilatları İttifaqının sədri Davud Rəhimliyə və Xəzər Universitetinin fiziki məhdudiyyətli tələbəsinə hədiyyə edildi. Memarlıq və dizayn departamenti tərəfindən Fuad Nəcəfova təşəkkürnamə, sərgidə fəal iştirak edən tələbələrə isə sertifikatlar təqdim olundu.

Bakı Mühəndislər Universitetinin professor və müəllim heyəti, ABAD qurumunun Dekorativ-tətbiqi xalq sənətkarlığı departamentinin müdiri Qəmər Qafarova həmin departamentin baş layihə meneceri Məryəm Hümbətova sərgiyə dəvət olunmuşdular.

Bu tədbir tələbələrin yaradıcı potensialını və peşəkar inkişafını nümayiş etdirməklə yanaşı, onların sosial məsuliyyətli layihələrə olan marağını da ortaya qoydu.

Sərgiyə müəllimlər, tələbələr, sənətsevərlər və əməkdaşlıq edən təşkilatların nümayəndələri böyük maraq göstərdilər.