Xəzər Universiteti Tarix və arxeologiya departamentinin müdiri Dos. Telman Nüsrətoğlu 30 iyun-1 iyul tarixində Monqolustanın tarixi şəhəri Karakurumda keçirilən beynəlxalq konfransda iştirak edərək, "Tarix boyunca Azərbaycan milli kimliyinin formalaşmasında  qonar-köçər boyların rolu" mövzusunda məruzə etmişdir. Departament müdiri konfrans çərçivəsində Monqolustanın keçmiş prezidenti, Karakurum şəhərinin yenidən bərpa layihəsinin də rəhbəri, şəhərin valisi N.Enkhbayar`la da görüşərək, müzakirələr aparıb.

 N.Enkhbayar çıxışında  Monqolustan dövlətinin Moğol-Türk tarixi memarlıq irsini dərindən öyrənərək,  Karakurumu onun əsasında yenidən  inşa etməyə başlayacağını bildirib. Məscid, kilsə və buddist məbədi yan-yana olan, Hun, Göktürk, Çingiz Xan imperiyasının mirasının qorunduğu, tarixi bazarın, küçələrin, yolların olduğu  Karakurum…

Departament müdiri işğaldan azad edildikdən sonra Laçın, Şuşa başda olmaqla Qarabağda  əslinə uyğunlaşdırılan, tarixi kimliyi qorunan quruculuq prosesindən də bəhs edərək, bu prosesin Karakurum üçün də örnək ola biləcəyini bildirib. Tarixçi alim səfər çərçivəsində Ötükən vadisində yerləşən Orxun abidələrinin ən mühümü olan Bilgə Xaqan və KülTigin abidələrini, tarixi Karabalasaqun bölgəsini də ziyarət edərək, incələmələr aparmışdır.