Tibb elmləri doktoru, neyrocərrah, professor Mahmut Gazi Yaşargil 2025-ci il iyunun 11-də 99 yaşında vəfat etmişdir.

Mahmut Gazi Yaşargil 1925-ci ildə Türkiyədə, Diyarbakırda anadan olmuş, ilk və orta təhsilini Ankarada al­mışdır.

1944-45-ci illərdə Almaniyanın Friedrich Schiller Universitetində (iki semestr), sonra İsveçrənin Basel Universitetində tibbi təhsil almış, 1950-ci ildə burada tibb doktoru dərəcəsini qazanmışdır. 1953-1993-cü illərdə müəyyən fasilələrlə İsveçrədə, əsasən Sürix Universitetində və universitet xəstəxanasında çalışmış, 1973-ci ildə professor və Neyrocər­rahiyyə departamentinin müdiri olmuşdur.

1965-67-ci illərdə ABŞ-da Vermont Universitetində (Burling-tonda) işləmişdir. 1994-cü ildən etibarən Amerikada, əsasən Arkansas Universitetinin tibb fakültəsində çalışmış, neyrocərrahiyyə üzrə araşdır­malar aparmış və dərs demişdir. 7500 cərrahiyyə əməliyyatı aparmış, 3000- dən çox peşəkar cərraha öz sənətinin sirlərini öyrətmişdir. Özü düzəltdiyi tibbi alətlərlə beyində əməliyyatlar aparmışdır. Çoxsaylı monoqrafiya və məqalələr müəllifidir. Çoxsaylı müka­fatlara, medallara və fəxri adlara layiq görülmüşdür. 1999-cu ildə “Neuro-surgery” dərgisi tərəfindən ənənəvi Neyrocərrahlar Konqresinin illik toplantısında “1950-1999-cu illər dövrünün neyrocərrahı” elan edilmiş­dir.

 Professor Mahmut Gazi Yaşargil 2014-cü ildə vətənə dönmüşdür. Ömrünün sonunadək  İstanbulda, Yeditepe Univer­sitetinin Beyin cərrahiyyəsi şöbəsinə rəhbərlik etmişdir.

Xəzər Universitetinin kollektivi Mahmut Gazi Yaşargil`in vəfatından kədərləndiyini bildirir, ailəsinə və Yeditepe Univer­sitetinin rəhbərliyinə dərin hüznlə başsağlığı verir.