2025-ci il mayın 26-27-də  Xəzər Universitetinin Mərmər salonunda “Ortaq türk kültürü: Oğuz türkmanların dünəni, bu günü və gələcəyi” mövzusunda beynəlxalq elmi simpozium keçirilib. Tədbir Xəzər Universiteti Mədəni Antropologiya və Folklor İnstitutu (MAFİ) tərəfindən təşkil olunub. Simpoziumda  Azərbaycan alimləri ilə yanaşı, digər ölkələrdən olan tanınmış tədqiqatçılar, ziyalılar və elm adamları iştirak ediblər.

Simpoziumun açılış mərasimi universitetin birinci kurs tələbələri Nigar Ələsgərli və Aydan Əliyevanın çıxışı ilə başlayıb. Onlar Oğuz türkmanların tarixi-mədəni kimliyini əks etdirən poetik nümunə ilə türk xalqlarının ortaq irsini və milli birliyini vurğulayıblar.

Tədbirdə ilk çıxış edən MAFİ-nin koordinatoru Dos. Aynur Qəzənfərqızı simpoziumun elmi məqsədlərindən danışaraq qeyd edib ki, bu cür toplantılar türklərin ortaq mədəni yaddaşını gücləndirmək və gənc nəsillərə ötürmək baxımından olduqca vacibdir.

Xəzər Universitetinin qurucusu, Direktorlar və Qəyyumlar Şurasının sədri Prof.Akad. Hamlet İsaxanlı Türk dünyasının qədim mədəniyyətini qorumaq və birgə elmi əməkdaşlığı inkişaf etdirmək zərurətini vurğulayıb.  Bildirib ki, türklərin ortaq mədəni kökləri bu gün elmi əsaslarla yenidən araşdırılmalı və gələcək nəsillərə çatdırılmalıdır.

Tədbirin fəxri qonaqlarından olan Türkmənistanın Azərbaycandakı fövqəladə və səlahiyyətli səfiri  Qurbanməmmet  Elyasov  türkmən və Azərbaycan xalqları arasında tarixən mövcud olan dostluq və qardaşlıq münasibətlərindən bəhs edib.

 Əməkdar elm xadimi, Prof. Qəzənfər Paşayev İraq türkmanlarının mədəniyyətindən söz açaraq, onların türk mədəni sistemində tutduğu özünəməxsus yeri elmi faktlarla əsaslandırıb. O, vurğulayıb ki, İraq türkmanları türk dilini, adət-ənənələrini və folklorunu qoruyaraq, öz kimliklərini bu günə qədər yaşada bilmişlər.

Türkmənistan Milli Elmlər Akademiyasının Dil, Ədəbiyyat və Milli Əlyazmalar İnstitutunun əməkdaşı Prof. Dövlətmurat Yazquliyev qədim türkmən ədəbiyyatının Ortaq Türk yazılı ənənəsi içindəki yerini təhlil edib və türkmən şairlərinin yaradıcılığını nümunə göstərərək, milli poetik dəyərlərin qorunmasından danışıb.

İraqın Bağdad Universitetinin professoru Siham Zengi türkman icmalarının tutduğu mövqedən, dillərinin və adət-ənənələrinin qorunmasından, həmçinin, türkmanların zəngin folklor irsinin mühitdə necə yaşadıldığından söz açıb.

AMEA Fəlsəfə İnstitutunun direktor müavini Prof. Eynulla Mədətli Türk fəlsəfi dünyagörüşünün formalaşmasında Oğuz türklərinin düşüncə mirasının rolunu önə çəkib və bu irsin çağdaş dövrdə fəlsəfi və mədəni əhəmiyyətini izah edib.

Tədbirin xarici (Niderland) qonaqlarından biri, azərbaycanşünas alim, Qarabağ haqqında üç dildə nəşr etdirdiyi 640 səhifəlik tədqiqat əsəri ilə tanınan Henri Van Renz  hazırda türkmən mədəniyyəti üzərində işlədiyini və bu simpoziumun onun üçün zəngin elmi material mənbəyi olduğunu bildirib.

Simpoziumun açılış mərasimi başa çatdıqdan sonra tədbir plenar iclaslarla davam edib, çıxışlar dinlənilib və elmi müzakirələr aparılıb.

Simpoziumun bədii hissəsində  Xəzər Universitetinin Kamera orkestri, universitetin müəllimi aşıq Ramin Qarayev  tədbir iştirakçılarına milli ruhda  musiqi təqdim ediblər.

Nigar Ələsgərli

Azerbaijan dili və ədəbiyyatı ixtisası, İ kurs