Xəzər Universitetində  2025-ci il mayın 27-də “Food Fair” adlı sosial yönümlü xeyriyyə yarmarkası keçirildi. Tədbir İqtisadiyyat və menecment fakültəsi, Tələbə Məclisi, Musiqi Klubu və İqtisadçı Tələbə İnkişaf Klubu tərəfindən birgə təşkil olunmuşdu.

Yarmarkanın əsas məqsədi universitet tələbələrinin təşəbbüskarlığını və sosial məsuliyyət hissini təşviq etməklə yanaşı, ehtiyac içində olan bir ailəyə maddi dəstək göstərmək idi. Tələbələr  ölkənin müxtəlif regionlarına məxsus məşhur yeməkləri hazırlayaraq, satışa təqdim etdilər və əldə olunan bütün gəlirin yardım məqsədilə istifadə olunması planlaşdırıldı.

Tədbirin həyata keçirilməsində bir sıra sponsorlar da yaxından iştirak etdilər. SAB şirkəti süd və ət məhsulları ilə, ABAD və “İrəvan Mətbəxi” isə özünəməxsus mətbəx nümunələri ilə tədbirə dəstək oldular. Eyni zamanda, “İlğım Azərbaycan” və “Mondiqo” brendlərinin də qatqısı ilə süfrələr daha da zənginləşdi.

Musiqi, dostluq və yardımlaşma ruhunda baş tutan bu tədbir həm tələbələr, həm də universitet kollektivi tərəfindən böyük maraqla qarşılandı. Bu təşəbbüs Xəzər Universiteti tələbələrinin cəmiyyətə faydalı və sosial cəhətdən məsuliyyətli fərdlər kimi formalaşmasında atılmış mühüm addımlardan biridir.