2025-ci il may ayı ərzində Xəzər Universitetinin İnşaat mühəndisliyi departamentinin tələbələri və tədqiqatçıları Azərbaycan Respublikasının Fövqəladə Hallar Nazirliyinin (FHN) Akademiyasında keçirilən iki elmi-texniki konfransda  iştirak edərək, universitetin elmi-akademik fəaliyyətini layiqincə təmsil ediblər. Departamentin tələbələrinin elmi tədqiqatlara cəlb olunması, beynəlxalq əməkdaşlıq imkanlarının genişləndirilməsi və fövqəladə hallarla bağlı mühüm mövzuların araşdırılması bu tədbirlərdə əsas diqqət mərkəzində olmuşdur.

 2025-ci il mayın 7-də FHN Akademiyasında keçirilən “İqlim dəyişikliyi ilə mübarizə və “Yaşıl dünya”: Araşdırma və tətbiqlər” adlı elmi konfransda İnşaat mühəndisliyi departamentinin tələbəsi Səriyyə Abışova  “İnşaatda fövqəladə hallarla mübarizənin aktual problemləri” adlı məqaləsini təqdim etmişdir. Məqalədə iqlim dəyişikliyinin tikinti sektoruna təsiri və bu istiqamətdə baş verə biləcək fövqəladə halların qarşısının alınması yolları elmi əsaslarla izah olunmuşdur.

 2025-ci il mayın 27-də təşkil edilən Ümummilli Lider Heydər Əliyevin 102-ci ildönümünə həsr olunmuş X Elmi-Texniki Konfransda isə Səriyyə Abışova  elmi araşdırmalarını davam etdirərək ikinci məqalə təqdim etmiş, Jalə Əsgərova “Tikinti sahələrində yanğın təhlükəsizliyi” adlı məqaləsi ilə çıxış edərək, risk azaldılması yollarına dair tövsiyələr vermişdir. İbrahim Aslan  Erasmus+ proqramı ilə Xəzər Universitetində tədqiqat aparan doktorant tələbə olaraq “Mühəndis qrafikasında dəqiqlik, təhlükəsizlik və texniki etibarlılıq aspektləri” adlı elmi çıxışla mühəndislik qrafikalarının praktiki əhəmiyyətindən bəhs etmişdir.

Hər üç tələbənin elmi işlərinin hazırlanmasında elmi rəhbər qismində Xəzər Universitetinin və Fövqəladə Hallar Nazirliyinin əməkdaşı Aynurə Əliyeva yaxından iştirak etmişdir. Onun rəhbərliyi və elmi dəstəyi sayəsində tələbələrin tədqiqatları konfrans tələblərinə uyğun şəkildə hazırlanaraq qəbul edilmişdir..

Eyni zamanda, tələbələrin məqalələrinin redaktəsi və təqdimatların hazırlanması prosesində İnşaat mühəndisliyi departamentinin assistenti Elnur Qəniyev təşkilati işlərdə mühüm rol oynamışdır. O, tələbələrin konfransa hazırlığını koordinasiya etmiş, təqdimat materiallarını və məqalələri texniki və akademik tələblərə uyğunlaşdırmışdır.

Xəzər Universitetinin İnşaat mühəndisliyi departamentinin müdiri Dr. Rasim Bayramlının rəhbərliyi altında tələbələrin elmi fəaliyyətləri getdikcə daha da güclənir. Hər iki konfransda iştirak edən tələbə və tədqiqatçılar sertifikatlarla təltif olunmuş, onların məqalələri isə konfrans materiallarında dərc edilmək üçün qəbul olunmuşdur.