Şimali Kipr Türk Cümhuriyyətinin Famagusta şəhərində yerləşən Doğu Akdeniz Universiteti Əczaçılıq fakültəsinin təşkilatçılığı ilə  2025-ci il mayın 14-də Beynəlxalq Əczaçılıq Konqresi -2025 (IPSC 2025) keçirilmişdir. Konqresdə dünyanın 20-dən çox ölkəsindən elm adamları, əczaçılıq və biotibbi tədqiqat sahələrində çalışan mütəxəssislər iştirak etmişdir.

Azərbaycanı bu nüfuzlu beynəlxalq elmi konqresdə Xəzər Universitetinin Həyat elmləri departamentinin müdiri Dr. Cəmalə Eldarova, departamentin dosenti Dr. Cavid Ocaqi və Fizika və elektronika departamentinin müdiri Dr. Fəridə Tatardar təmsil etmişlər.

Konqres zamanı Dr. Cəmalə Eldarova “Azərbaycan mənşəli çay nümunələrinin genetik müxtəlifliyinin və farmakoloji xüsusiyyətlərinin tədqiqi” (“Exploring the genetic diversity and pharmacological properties of Azerbaijani tea accessions”) adlı məruzəsində Azərbaycan mənşəli çay nümunələrinin genetik müxtəlifliyinə və onların farmakoloji təsirlərinə, yerli çay nümunələrinin yüksək antioksidant potensialı  barədə aparılan molekulyar və biokimyəvi analizlərinə dair nəticələrini bölüşmüşdür. Məruzə xüsusilə təbii mənşəli dərman vasitələrinin hazırlanmasında çay bitkisinin əhəmiyyətinə diqqət çəkmişdir.

Dr. Cavid Ocaqi “Arpa və üzüm bitkisində β-qlükan və resveratrolun genetik müxtəlifliyi və sağlamlığa faydası” (“Genetic variation and health benefits of β-glucan and resveratrol in barley and grape wine”) adlı məruzəsində arpa və üzüm növlərində bioaktiv maddələrin (β-qlukan və resveratrol) genetik dəyişkənliyini və insan sağlamlığına təsirlərini izah etmişdir. Onun tədqiqatı arpa və üzüm bitkilərinin molekulyar səviyyədə öyrənilməsi və qidalanmada istifadəsi baxımından böyük əhəmiyyət daşıyır.

Dr. Fəridə Tatardar konqresdə “Elektrospin nanoliflər: Farmoseptik və biotibbi tətbiqləri” (“Electrospun nanofibers: Pharmaceutics and biomedical applications”) adlı məruzə ilə çıxış etmişdir. Elektrospin nanoliflər son illərdə farmasevtik və biotibbi sahələrdə böyük maraq doğurur. Bu liflər dərman daşıma sistemləri, yara sarğıları və toxuma mühəndisliyi kimi tətbiq sahələrində geniş istifadə olunur. Bu səbəbdən nanoliflər gələcəkdə tibbi məhsulların inkişafında mühüm rol oynaya bilər.

Azərbaycanlı tədqiqatçıların təqdim etdiyi elmi nəticələr maraqla qarşılanmış və müzakirələrə səbəb olmuşdur. Konqres çərçivəsində bir sıra beynəlxalq akademik qurumlarla elmi əməkdaşlıq üçün ilkin razılaşmalar əldə olunmuşdur.

Konqresin sonunda iştirakçılara sertifikat təqdim edilmişdir.