2025-ci il mayın 18-də Xəzər universitetin Humanitar, təhsil və sosial elmlər fakültəsinin tarix müəllimliyi ixtisasının dördüncü kurs tələbələri “Müharibələr tarixi” fənninə aid olan “Azərbaycanın müdafiə tikililəri” mövzusu ilə bağlı AMEA Arxeologiya və Antropologiya İnstitutunun “Arxeoloji abidələrin toplusu şöbəsi” və Xəzər Universitetinin Tarix və arxeologiya departamentinin təşkilatçılığı ilə “Yanardağ”, “Dördkünc Mərdəkan qalası” və “Ramana qalası” abidələrində tədris ekskursiyasında  olublar. Azərbaycan Milli Elmlər Akademiyasının (AMEA)  əməkdaşları  Dos. Mikayıl Mustafayev,  Tarix və arxeologiya departamentinin  müəllimi Orxan Zamanov və tələbələrin təşəbbüsü ilə təşkil olunan  xüsusi akademik ekskursiya Azərbaycanın müdafiə memarlığının vacib tərkib hissəsi olan Bakı ətrafı qalaların xalqımızın hərb tarixindəki mühüm rolunun əyani qavranması baxımından əhəmiyyətli idi.

Səfərin öncədən təyin olunmuş proqramına əsasən ilk olaraq “Yanardağ” Dövlət Tarix-Mədəniyyət və Təbiət  Qoruğu ərazisinə səfər edildi. Burada ekskursiya zamanı bələdçi abidə ərazisindəki tarixi tikililəri və eksponatları əyani şəkildə göstərərək,  tələbələri ətraflı məlumatlandırdı.

 Sonra səfərin əsas hissəsi olan Mərdəkan və Ramana qalalarına maraqlı ekskursiya başlandı. Tələbələr qədim tarixə malik  Ramana kəndinə səfər edərək, “Ramana qalası”nda oldular. Burada bələdçi tələbələrə ərazinin və qalanın tarixi haqqında geniş məlumat verdi və onları  qalanın ətrafının və daxilinin vəziyyəti ilə tanış etdi. Dördkünc qalaya səfər zamanı Mərdəkanın ağsaqqallarından biri olan Vidadi Yaptumov tələbələrə Mərdəkan tarixi, burada olan tikililər, “Dördkünc Mərdəkan qalası” haqqında məlumat verdi. Sonra isə  tələbələr qalaya qalxaraq, xatirə şəkilləri çəkdirdilər.

Tədris ekskursiyası zamanı  fənn müəllimi O. Zamanov, və orta əsrlər mütəxəssisi M.Mustafayev tələbələrə sözügedən qalaların tədqiqi, nə məqsədlə istifadə olunması və onların ölkəmizin tarixində yeri haqqında ətraflı danışdı, səfərdə iştirak edən Xəzər Universitetinin müəllimi Dr. Rüxsarə Quliyeva və digər mütəxəssislərlə birgə Azərbaycan qalaları barədə geniş müzakirə apardı. Abidələrlə əyani tanışlıq tələbələr tərəfindən maraqla qarşılandı.