2025-ci il mayın 13-də Xəzər Universitetində Türkiyənin İstanbul Beykent Universitetinin nümayəndə heyəti ilə görüş keçirilib.

Görüşdə İstanbul Beykent Universitetinin rektoru Prof. Dr. Volkan Öngel, Mütevelli heyətinin sədri Dr. İsmail Erkan Çelik, Beynəlxalq əlaqələr şöbəsinin müdiri Aybala Yavuzarslan və universitetin Tələbə dekanlığı koordinatoru Serhat Butur, Xəzər Universitetindən isə universitetin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, Rektor vəzifəsini icra edən Prof. Məhəmməd Nuriyev, fakültə dekanları və Beynəlxalq əlaqələr şöbəsinin əməkdaşları iştirak ediblər.

Görüş zamanı iki universitet arasında təhsil sahəsində əməkdaşlıq imkanları, eləcə də qarşılıqlı maraq doğuran digər sahələrdə birgə layihələrin həyata keçirilməsi imkanları müzakirə olunub. Tərəflər akademik əlaqələrin inkişaf etdirilməsi və davamlı əməkdaşlığın qurulması istiqamətində fikir mübadiləsi aparıblar.

Tədbirdə Beynəlxalq əlaqələr şöbəsinin müdiri Fatimə Vəliyeva Xəzər Universiteti haqqında təqdimatla çıxış edərək, qonaqlara universitetin tarixi, beynəlxalq əməkdaşlıqları və imkanları barədə geniş məlumat verib.

Görüş çərçivəsində Xəzər Universiteti və İstanbul Beykent Universiteti arasında Anlaşma Memorandumu imzalanıb. Bu sənəd birgə layihələrin həyata keçirilməsi və ikitərəfli tərəfdaşlığın qurulmasına əsas yaradır.

Görüşün sonunda hədiyyələr təqdim olunub və xatirə şəkilləri çəkilib.