2025-ci il mayın 12-də Bakı Türk Anadolu Liseyində “Anadolu Məktəbi Yazıçı Oxuları” çərçivəsində “Çölün Bilgəsi Çingiz Aytmatov” mövzusunda panel keçirilmişdir. Panelin təşkilatçısı, liseyin türk dili və ədəbiyyatı müəllimi Meral Bahar “Anadolu Məktəbi Yazıçı Oxuları” haqda məlumat vermişdir. Bakı Türk Anadolu Liseyinin müdiri Abdullah Yılmaz Anadolu Məktəbinin keçirdiyi panellər və mütaliə günlərinin türk dünyasını zəngin mədəni irs ətrafında birləşdirdiyini vurğulamış, panel iştirakçılarına uğurlar arzulamışdır.

Panelin rəhbəri - Ali İzzet Kavuk və panelistlər Bakı Türk Anadolu Liseyinin şagirdləridir. Liseyin şagirdləri Zehra Aydın “Çingiz Aytmatovun əsərlərində ata obrazı”, Rahmet Satı Koyuncu “Çingiz Aytmatovun əsərlərində müharibə”, Arzu Rüstəmzadə “Çingiz Aytmatovun əsərlərində mifoloji elementlər”, Melike Betül Kadirhan “Aytmatovun pəncərəsindən insanın daxili dünyasına baxış” mövzularında çıxış etmişlər.

Xəzər Universitetinin Dillər və ədəbiyyatlar departamentinin müəllimi Ülvi Babasoy panelistlərin çıxışlarını qiymətləndirmişdir. Ülvi Babasoy Aytmatovun nəsrini ata fenomeni, müharibə, mifologiya və daxilə çəkilməyin estetikası kontekstində təhlil etmişdir. Ülvi Babasoya Türkiyənin Azərbaycandakı səfirliyinin Təhsil müşavirliyinin plaketi təqdim olunmuşdur. Sonda liseyin şagirdlərinin Çingiz Aytmatov yaradıcılığının motivləri əsasında çəkdikləri rəsm əsərlərinin sərgisi nümayiş etdirilmişdir.