2025-ci il aprelin 13-dən 16-dək Səudiyyə Ərəbistanının paytaxtı Ər-Riyad şəhərində dünyanın müxtəlif ölkələrindən gəlmiş ali təhsil müəssisələrinin iştirakı ilə “Education Global Exhibition (EDGEx 2025)” adlı beynəlxalq təhsil sərgisi təşkil edilmişdir. Bu nüfuzlu tədbirdə Azərbaycanı təmsil edən ali məktəblərdən biri də Xəzər Universiteti olmuşdur.

Tədbir çərçivəsində Xəzər Universiteti rektorunun  beynəlxalq əlaqələr üzrə müşaviri Prof. Əhməd Sami Elaydİ bir sıra ərəb və beynəlxalq universitetlərin nümayəndələri ilə ikitərəfli görüşlər keçirmiş, qarşılıqlı maraq doğuran elmi və akademik əməkdaşlıq imkanlarını müzakirə etmişdir. Görüşlərdə tələbə və müəllim mübadiləsi, birgə elmi konfransların təşkili, ortaq elmi tədqiqat layihələri və beynəlxalq elmi nəşrlərdə əməkdaşlıq kimi mövzular əsas diqqət mərkəzində olmuşdur.

Tədbir zamanı   sərgi iştirakçılarına və maraqlı tərəflərə Xəzər Universiteti haqqında, universitetin tarixi, akademik fakültələri, ingilis dilində tədris imkanları, beynəlxalq proqramları və tələbələrə təqdim olunan təqaüd və yaşayış şəraiti barədə ətraflı məlumat verilmişdir. Eyni zamanda, universitetin beynəlxalq əlaqələri və gələcəkdə ərəb ölkələri ilə əməkdaşlıq perspektivləri də vurğulanmışdır.

EDGEx sərgisi Yaxın Şərqdə ali təhsilin gələcəyinə dair ən genişmiqyaslı və əhatəli tədbirlərdən biri sayılır. Bu ilki sərgidə 100-dən çox universitet və ali təhsil qurumu,  minlərlə tələbə nümayəndələri, təhsil menecerləri, müəllimlər və beynəlxalq təhsil sahəsində çalışan mütəxəssislər iştirak etmişdir. Tədbir zamanı təhsildə innovasiyalar, rəqəmsal transformasiya, beynəlxalq əməkdaşlıq, keyfiyyətin təminatı və ali təhsilin qlobal çağırışları kimi aktual mövzularda panel müzakirələr və təlim seminarları keçirilmişdir.

Tədbir, həmçinin, ərəb dünyasında Azərbaycan təhsilinin təbliği baxımından da mühüm bir platforma olmuşdur və Xəzər Universiteti gələcəkdə də bu tip təşəbbüslərdə fəal iştirak etməyi planlaşdırır.