2025-ci il aprelin 29-da Xəzər Universitetində Türkiyənin Üsküdar Universitetinin nümayəndə heyəti ilə görüş keçirilib. Görüşdə Üsküdar Universitetinin rektoru Prof. Dr. Nazife Güngör, Xəzər Universitetinin rektor vəzifəsini icra edən Prof. Məhəmməd Nuriyev, dekanlar və Beynəlxalq əlaqələr şöbəsinin nümayəndələri iştirak ediblər.

Görüş zamanı tərəflər arasında təhsil və tədqiqat sahələrində əməkdaşlığın genişləndirilməsi, tələbə və müəllim mübadiləsi, birgə elmi layihələrin həyata keçirilməsi və digər qarşılıqlı maraq doğuran məsələlər ətrafında fikir mübadiləsi aparılıb. Müzakirələrin əsas mövzusu iki universitet arasında akademik əməkdaşlıq və əlaqələrin inkişaf etdirilməsi olub.

Görüş çərçivəsində Xəzər Universiteti və Üsküdar Universiteti arasında Anlaşma Memorandumu imzalanıb. Bu sənəd tərəflər arasında strateji tərəfdaşlığın qurulmasına və gələcəkdə birgə layihələrin həyata keçirilməsinə zəmin yaradır.

Görüşün sonunda hədiyyələr təqdim olunub və xatirə şəkilləri çəkilib.