2025-ci il mayın 1-də  Xəzər Universitetinin Mərmər salonunda “Biznes nümayəndələrinin tələbələrlə görüşü” adlı tədbir keçirildi. Görüş universitetin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının təşəbbüsü ilə 27 fevral 2025-ci il tarixində yaradılmış Biznes-Sənaye Klubunun (KUBIC) təşkilatçılığı ilə baş tutdu.

Tədbiri Xəzər Universitetinin İctimai əlaqələr və media üzrə direktoru Əlövsət Əmirbəyli açaraq, iştirakçıları salamladı və tədbirin məqsədi barədə ətraflı məlumat verdi. Görüşün moderatoru universitetin Həyat elmləri departamentinin müdiri Dr. Cəmalə Eldarova oldu.

Tədbirdə KUBIC-in İdarə Heyətinin üzvləri – müxtəlif sahələri təmsil edən biznes nümayəndələri: ENERGAZER şirkətinin baş icraçı direktoru Süleyman Məcidli, HRC GROUP-un təsisçisi və direktoru, eyni zamanda Bakuelectronics şirkətinin direktor müavini Ruslan Hümbətov, Financial Chain Corporation-un idarəedici tərəfdaşı Zaur Qədirov və Parla Pharmaceuticals şirkətinin baş icraçı direktoru Arash Nosrati iştirak edərək, tələbələrlə karyera təcrübələrini bölüşdülər. Onlar biznes mühitindəki son yeniliklər, mövcud çağırışlar və uğur strategiyaları barədə dəyərli məlumatlar təqdim etdilər.

Süleyman Məcidli çıxışında KUBIC-in yaradılma məqsədi, təşəbbüsün yaranma mərhələləri,  klubun loqosu, vizionu, fəaliyyət istiqamətləri barədə danışdı. O, klubun tələbələr üçün peşəkar inkişaf, şəbəkələşmə və layihələrdə iştirak imkanları baxımından geniş üstünlüklər yaratdığını qeyd etdi.

Ruslan Hümbətov klub çərçivəsində təqdim olunacaq təcrübə və işə qəbul imkanları haqqında məlumat verərək, tələbələrin real iş mühitində təcrübə qazanmasının əhəmiyyətini nəzərə çatdırdı.

Zaur Qədirov isə klubun planlaşdırdığı seminar, vorkshoplar, təqaüd proqramları, yay məktəbləri və beynəlxalq tələbə mübadilə proqramları haqqında geniş məlumat verdi, tələbələrin qlobal düşüncə tərzi və rəqabətə davamlı bacarıqlar qazanmasının önəmini vurğuladı.

Arash Nosrati isə KUBIC-in startap akselerator proqramından danışdı. O, bu proqramın tələbələrin öz innovativ ideyalarını inkişaf etdirmələri, sahibkarlıq potensiallarını reallaşdırmaları və beynəlxalq səviyyədə təqdim etmələri üçün yaratdığı mentorluq, maliyyə və şəbəkələşmə imkanlarını açıqladı.

Tədbirin interaktiv hissəsində çoxsaylı tələbələr məruzəçilərə təcrübə proqramları, xarici əməkdaşlıqlar, mentorluq, akademik dəstək, startap inkişafı və karyera quruculuğu ilə bağlı suallar ünvanladılar. Spikerlər hər suala ətraflı və həvəsləndirici cavablar verərək, tələbələrin maraqlarını yüksək dərəcədə nəzərə aldılar.

Tədbirin sonunda qeyd olundu ki, bu görüş KUBIC-in fəaliyyətinin ilk addımıdır və gələcəkdə daha genişmiqyaslı layihələr, yeni tərəfdaşlıqlar və beynəlxalq əməkdaşlıqlar planlaşdırılır. Biznes-Sənaye Klubu universitet daxilində tələbələrin bilik, bacarıq və təşəbbüskar düşüncələrinin inkişafı üçün əhəmiyyətli bir platformaya çevrilməkdədir.

Tədbirin sonunda xatirə şəkilləri çəkildi.