2025-ci il aprelin 18-dən 20-dək “YAŞAT” Fondunun təşkilatçılığı ilə “Konstitusiya və Suverenlik İli” çərçivəsində şəhid övladları üçün 1-ci intellektual marafon təşkil olunub. Bu barədə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsi məlumat verib.

Layihə 16-21 yaş aralığında olan 50-yə yaxın şəhid övladını əhatə edib. Marafon Şahdağ Turizm Mərkəzinin dəstəyi, “PAŞA Technology” MMC və Dünya Türk Biznes Şurasının (DTİK) sponsorluğu ilə həyata keçirilib.

Marafonun əsas məqsədi iştirakçıların asudə vaxtlarının səmərəli təşkili, onların intellektual inkişafına dəstək olmaq, yeni bilik və bacarıqlar qazanmalarına şərait yaratmaqdan ibarət olub. Tədbir çərçivəsində müxtəlif intellektual oyunlar, bilik yarışmaları və əyləncə saatları təşkil edilib. Yarışın sonunda bütün iştirakçılar və qaliblər qiymətli hədiyyə və mükafatlarla təltif olunublar.

Tədbirdə Xəzər Universitetinin Humanitar, təhsil və sosial elmlər fakültəsinin tələbələri – Politologiya ixtisasının 1-ci kurs tələbəsi Mətləb Samidli və Tərcümə (İngilis dili) ixtisasının 3-cü kurs tələbəsi Abbas İsgəndərli də fəal iştirak ediblər. Mətləb Samidlinin komandası I yerə, Abbas İsgəndərlinin komandası isə II yerə layiq görülüb.

“YAŞAT” Fondu tərəfindən şəhid övladları üçün həm ölkə daxilində, həm də xaricdə müxtəlif təlim kursları, düşərgələr və inkişaf yönümlü tədbirlər mütəmadi olaraq təşkil olunur.