2025-ci il aprelin 15-də Xəzər Universitəsinin ənənəvi “Elm və Sənət Məclisi”nin 83-cü məşğələsi keçirildi. Məşğələni giriş sözü ilə Xəzər Universitəsinin təsisçisi, Direktorlar və Qəyyumlar Şurasının sədri, Prof.Akad. Hamlet İsaxanlı açaraq, “Himnimiz necə yarandı: faktlar və həqiqətlər” mövzusu və bununla əlaqədar  3 il ərzində aparılmış elmi araşdırma haqqında geniş məlumat verdi, məruzəçi Prof. Asif Rüstəmlini iştirakçılara təqdim etdi.

Sonra Azərbaycan Respublikasının Dövlət Himni iştirakçıların ifasında səsələndirildi.

A. Rüstəmli dövlət himninin sözləri ilə bağlı uzun müddət apardığı elmi araşdırma haqqında məlumat verdi və dövlət himninin müəllifinin Əhmət Cavad deyil, Cəmo bəy Cəbrayılbəyli olduğunu qeyd etdi. O, bu araşdırmaların nəticəsi olaraq rəsmi sənədlər əsasında hazırlanmış və 2024-cü ildə çap edilmiş 204 səhifəlik “Cəmo bəy Cəbrayılbəyli: həyatı və yaradıcılığı” adlı kitabından arxiv sənədlərini nümayiş etdirdi.

Məruzədən sonra müzakirələr başlandı. Uzun sürən müzakirələrdə Tahir Aydınoğlu (“Xalq qəzeti”), Hamlet İsaxanlı (Xəzər Universiteti), Kamil Şahverdiyev, Yavuz Akpınar (İzmir), bəstəkar Sərdar Fərəcov, Orxan Nəcəfov (AMEA-nın Şərqşünaslıq İnstitutu), bəstəkar Aydın Əzimov, Dilqəm Əhməd (İstanbul), Əli Şamil ( AMEA-nın Folklor İnstitutu), Azad Şükürov (Azərbaycan Dövlət Mədəniyyət və İncəsənət Universiteti), Bədirxan Əhmədov (Xəzər Universiteti), Namiq Əhmədov (“Xalq qəzeti”), Ədalət Tahirzadə( Bakı Avrasiya Universiteti), Firdovsiyyə Əhmədova ( AR prezidenti yanında Dövlət İdarəçilik Akademiyası), Solmaz Tohidi (AMEA-nın Şərqşünaslıq İnstitutu) və digərləri çıxış etdilər və təkliflərini verdilər.

Tədbirə Azərbaycanın çoxsaylı elm adamları, həmçinin ZOOM vasitəsilə dünyanın müxtəlif ölkələrindən mütəxəssislər qatılmışdılar. Sonda Hamlet İsaxanlı seminara yekun vuraraq,  iştirakçılara təşəkkürünü bildirdi.