Xəzər Universitetinin məzunu Rəxşəndə İkram qızı Daşdəmirova tərəfindən təsis edilən Ulusum.az internet xəbər portalı fəaliyyətə başlayıb. Ulusum.az İnformasiya Agentliyi müstəqil informasiya siyasəti həyata keçirən media qurumudur. Quruma 12.03.2025-ci ildə Azərbaycan Respublikası Media Reyestri şəhadətnaməsi verilmişdir.

Ulusum.az Azərbaycanda, regionda və dünyada baş verən hadisələr barədə oxucularına operativ məlumatlar verir, reportaj, araşdırma, müsahibə və digər publisistik materiallar təqdim edir.

Yeni yaradılmış platforma milli kimlik, ədəbiyyat, mədəniyyət və ictimai düşüncə sahəsində aktual mövzuları işıqlandırmağı, eyni zamanda gənc yazar və oxucular üçün maarifləndirici məkan yaratmağı qarşısına məqsəd qoyur.

Saytın təsisçisi Rəxşəndə Daşdəmirova bildirib ki, Ulusum.az ideyası uzunmüddətli müşahidələrin və ictimai ehtiyacların nəticəsi kimi yaranıb: “Ulusum.az yalnız bir xəbər portalı deyil, milli dəyərləri qoruyan və inkişaf etdirən bir düşüncə platforması olmağa iddialıdır.”

Müasir dizayn və məzmun yanaşması ilə fərqlənən sayt artıq sosial mediada da aktiv şəkildə fəaliyyət göstərir. Layihənin gələcək hədəfləri arasında müxtəlif müzakirə forumları, yazı müsabiqələri və gənclər üçün interaktiv layihələr yer almaqdadır.

Məzun haqda

R. Daşdəmirova 1994-1998-ci illərdə Xəzər Universitetində “İngilis dili və ədəbiyyatı” ixtisası üzrə bakalavr, 1998-2001-ci illərdə “İngilis dili və ədəbiyyatı” ixtisaslaşması üzrə magistr təhsili almışdır.

O, peşə həyatına A.Məhərrəmov adına 7 saylı orta məktəbdə ibtidai siniflərdə ingilis dili müəllimi olaraq başlamış, sonralar isə Azərbaycan Əmək və Sosial Münasibətlər Akademiyası, Rabitə və Yüksək Texnologiyalar Nazirliyinin Dövlət Radiotezliklər İdarəsi və İnformasiya Texnologiyalarının İnkişafı Dövlət Fondunda davam etdirmişdir. Həmçinin, o, "Fortuna" MMC şirkətində direktor müavini vəzifəsində çalışmışdır. R. Daşdəmirova 2024-cü ilin avqust ayından etibarən Global Management Consulting MMC-nin direktoru olaraq əmək fəaliyyətini davam etdirir.