2025-ci il aprelin 9-da Xəzər Universitetində Azərbaycan Respublikası Müdafiə Sənayesi Nazirliyinin Milli Aerokosmik Agentliyinin maliyyə hesabatlığı və mühasibat şöbəsinin rəisi Dos. Elsevər İbadov və nazirliyin Elmi Tədqiqat İnstitunun müşaviri, texnika elmləri üzrə fəlsəfə doktoru Qamət Kərimovla görüş keçirildi.

Universitetin rəhbər heyəti və əməkdaşlarının iştirakı ilə keçən  görüşün əsas məqsədi müdafiə texnologiyaları sahəsində innovativ təşəbbüslərin universitet mühiti ilə inteqrasiyasına çalışmaq və bu işə tələbələri cəlb etmək idi.

Qeyd olundun ki, müdafiə sənayesində innovasiyaların təşviqi və texnologiya yönümlü layihələrin inkişafı məqsədilə nazirliyin dəstəyi və Azərsilah Holdinqin təşəbbüsü ilə “Def-Age” platforması yaradılır. Bu təşəbbüs müdafiə texnologiyaları sahəsində güclü ekosistemin formalaşdırılması, innovativ ideyaların dəstəklənməsi və gələcək nəsil mütəxəssislərin hazırlanmasına yönəlib.

Qamət Kərimov “Def-Age” platformasının təqdimatı zamanı ilk fəaliyyət mərhələsi olaraq planlaşdırılan və 4 ay davam edəcək “Boot Camp” proqramı haqqında ətraflı məlumat verdi. Bu proqram çərçivəsində iştirakçılara müdafiə sahəsindəki innovativ texnologiyalar, layihə rəhbərliyi, tətbiqi mühəndislik və startap yanaşmaları üzrə intensiv təlimlər keçiriləcək.

Bununla yanaşı, görüşdə 15-30 aprel tarixləri arasında universitet tələbələri üçün bir saatlıq infosessiya təşkil olunması razılaşdırıldı. Bu sessiya vasitəsilə tələbələr “Boot Camp” haqqında ətraflı məlumat əldə edəcək və iştirak imkanları ilə tanış olacaqlar.

Görüşdə səsləndirilən digər önəmli təşəbbüslərdən biri də “Müdafiə Texnologiyaları Klubu”nun yaradılması ideyası olub. “Boot Camp” proqramında fərqlənən iştirakçıların əldə etdikləri bilik və bacarıqları layihələrində tətbiq etmələri, həmçinin bu təcrübəni digər tələbələrlə bölüşmələri məqsədilə universitetlərdə aktiv fəaliyyət göstərən klubların qurulması nəzərdə tutulur.

“Def-Age” platforması çərçivəsində təşkil olunacaq seminarlar, təlimlər, yarışlar, inkubasiya və akselerasiya proqramları, bootcamplar və demoday tədbirləri ilə Azərbaycanda müdafiə texnologiyaları sahəsində innovasiyaların sürətlənməsinə mühüm töhfə verilməsi gözlənilir.