Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı 2025-ci il aprelin 5-də Xəzər Universiteti Sumqayıt “Dünya” məktəbinin Sumqayıt Şəhər Heydər Əliyev Mərkəzində təşkil etdiyi “Dünyanın Gəncləri – Gənclərin Dünyası” adlı tədbirin “Süni İntellekt və gənclər: sonsuz imkanlar” mövzulu paneldə məruzəçi kimi çıxış etmişdir.

Elm və Ali Təhsil üzrə Dövlət Agentliyi Ali təhsil müəssisələri ilə iş sektorunun müdiri, SABAH qrupları İcra Komitəsinin rəhbəri Dos. Elza Səmədovanın moderatorluğu ilə keçən paneldə Çankaya Universiteti (Türkiyə) rektorunun müşaviri, Prof. Buket Akkoyunlu, AMEA-nın müxbir üzvü, AMEA-nın Riyaziyyat və Mexanika İnstitutunun direktoru,  fizika-riyaziyyat elmləri doktoru, Prof. Misir Mərdanov, Azərbaycan Respublikası Milli Məclisinin deputatı Dr. Ceyhun Məmmədov, “Dünya” məktəbinin və Boston Universitetinin məzunu, “Neurotime” şirkətinin rəhbəri, “Novix Capital” və “BH Media” şirkətlərində Müşahidə Şurasının sədri Vüqar Cavadov, Almaniyada süni zəka üzrə “İlin gənc tədqiqatçısı”, “Mersedes-Benz Consulting” şirkətinin süni intellekt üzrə baş məsləhətçisi, “Google” şirkətinin xanımlar üçün təsis etdiyi qrantın ilk azərbaycanlı qalibi Günay Kazımzadə çıxış ediblər.

Çıxışlardan sonra suallar cavablandırılıb, panel iştirakçıları şagirdlərin təşkil etdiyi sərgi ilə tanış olublar.

Xəzər Universitetinin İqtisadiyyat və menecment fakültəsinin dekanı Dr. Raziyə İsayeva və universitetin digər əməkdaşları  da  tədbirdə iştirak ediblər.

Sumqayıt “Dünya” məktəbindən Prof.Akad. Hamlet İsaxanlıya təşəkkür məktubu göndərilib

Hörmətli Hamlet müəllim!

“Gənclərin Dünyası – Dünyanın Gəncləri” adlı tədbirimizi çox maraqlı və fəlsəfi çıxışınızla yekunlaşdıraraq iştirakçılara həm ilham verdiniz, həm də dəyərli fikirlərinizlə gənclərin gələcəyinə dair daha geniş perspektivlər təqdim etdiniz. Sizin dərin təcrübəniz və strateji yanaşmanız həm iştirakçılara, həm də tədbirə qatılan hər kəsə mühüm təcrübə və yeni düşüncə əlavə etdi.

Tədbirimizdə iştirakınız bizim üçün böyük şərəfdir. Dəyərli çıxışınızla tədbirin yekununa xüsusi bir zənginlik qatdığınız üçün Sizə bir daha təşəkkür edirik.

Dərin təşəkkürlərimizlə,

Xəzər Universiteti Sumqayıt “Dünya” Məktəbi