2025-ci il  martın 10-da Xəzər Universitetinin təşkilatçılığı ilə “Dünya” məktəbində “Sİ-nin davamlılıq və yaşıl bacarıqların inkişafına təsiri” mövzusunda seminar keçirildi. Tədbirdə Xəzər Universitetinin və “Dünya” məktəbinin əməkdaşları iştirak etdilər.

Tədbirin açılışında Xəzər Universitetinin İqtisadiyyat və menecment fakültəsinin dekanı Dr. Raziyə İsayeva çıxış edərək, spikeri təqdim etdi və seminarın proqramı haqqında ümumi məlumat verdi.

Seminarın əsas məruzəçisi, Cambridge Universitetinin mütəxəssisi Dr. Maria Toro Troconis süni intellektin (Sİ) davamlılığın təmin edilməsində və yaşıl bacarıqların inkişafında oynadığı roldan bəhs etdi. O, Sİ texnologiyalarının ekoloji problemlərin həllində, karbon izinin azaldılmasında və təmiz enerjidən istifadənin genişləndirilməsində necə tətbiq oluna biləcəyini aydınlaşdırdı.

Seminar interaktiv müzakirələrlə yekunlaşdı. İştirakçılar süni intellektdən istifadə ilə müxtəlif fəaliyyətlərdə iştirak etdilər.