Nəvai adına Daşkənd Dövlət Özbək dili və Ədəbiyyatı Universitetinin doktorantı Dilbər Haydarova 2025-ci ilin mart ayında Xəzər Universitetində elmi təcrübə keçib. O, universitetin Mədəni Antropologiya və Folklor İnstitutuna (MAFİ) gələrək, elmi-tədqiqat fəaliyyəti ilə tanış olub, folklor araşdırmaları aparıb və bu sahədəki bilik və təcrübəsini artırıb.

Dilbər Haydarova elmi təcrübəsini Mədəni Antropologiya və Folklor İnstitutunun koordinatoru Dos. Aynur Qəzənfərqızının rəhbərliyi altında keçib. Bu müddətdə əsas diqqət onun dissertasiya mövzusu – “Özbəkistan və Azərbaycan miflərində qadın obrazları” ilə bağlı elmi nəşrlərin toplanması və tədqiqinə yönəldilib. Bundan əlavə, Dos. Aynur Qəzənfərqızının təşəbbüsü ilə Dilbər Haydarova Azərbaycan Milli Elmlər Akademiyasının Folklor İnstitutunda  tanınmış folklorşünaslarla görüşlər keçirib və elmi müzakirələr aparıb. Xüsusilə, professor Füzuli Bayatın Türk dünyası miflərində qadın obrazları mövzusunda təqdim etdiyi məruzə onun üçün əhəmiyyətli olub.

Azərbaycan folklorunun canlı nümunələri ilə yaxından tanış olmaq məqsədilə Aynur Qəzənfərqızı və Dilbər Haydarova Azərbaycanın Qusar rayonuna səfər ediblər. Burada özbək doktorant İlaxır Çərşənbənin qeyd olunması ənənələrini müşahidə edərək, maraqlı məlumatlar toplayıb.

Təcrübə müddətini uğurla başa vurduğuna görə Dilbər Haydarovaya sertifikat təqdim edilib. Qeyd edək ki, onun elmi işinin ikinci rəhbəri Xəzər Universitetinin Mədəni Antropologiya və Folklor İnstitutunun koordinatoru Dos. Aynur Qəzənfərqızıdır.

Nigar Ələsgərli
Xəzər Universiteti, Azərbaycan dili və ədəbiyyat müəllimliyi ixtisası (1-ci kurs), Xəzər MAFİ könüllüsü

Aydan Əliyeva
Xəzər Universiteti, Filologiya (Azərbaycan dili və ədəbiyyatı) ixtisası (1-ci kurs), Xəzər MAFİ könüllüsü