2025-ci il martın 24-28-də Xəzər Universitetinin Siyasi elmlər və fəlsəfə departamentinin müdiri Dos. Orxan Vəliyev və departamentin bir qrup tələbəsi Beynəlxalq Münasibətlər və Diplomatiya üzrə Yaz Məktəbində iştirak ediblər. Yaz Məktəbi Strateji Düşüncə Tələbə Diplomatiya Mərkəzi və Bir Könüllü Tələbə Təşkilatı tərəfindən təşkil olunub.

Tədbir çərçivəsində Dos. Orxan Vəliyev “Qeyri-müəyyənlik dövründə türk refleksi: Türk Dövlətləri Təşkilatı” mövzusunda məruzə ilə çıxış edib. Təlim zamanı iştirakçılara qeyri-müəyyənlik şəraitində Türk Dövlətləri Təşkilatının regional əməkdaşlıqda rolu, türkdilli ölkələrin geosiyasi yanaşmaları və gələcək perspektivləri haqqında ətraflı məlumat verilib.

Yaz Məktəbində Xəzər Universitetinin Siyasi elmlər və fəlsəfə departamentinin magistrantları Firuzə İsmayılova, Mələk Hüseynova, bakalavr tələbələrindən isə Azər Həsənov, Mir Aqşin Əlizadə, Seyid Həsənli, Elçin Aşurlu və İbrahim Ələsgərli iştirak ediblər. Beş gün davam edən proqram çərçivəsində tələbələr həm nəzəri biliklərini artırıb, həm də qrup işləri və təqdimatlar vasitəsilə öyrəndiklərini praktik şəkildə tətbiq etmək imkanı qazanıblar.